ZAKECI 83 - Kemethajüh (N) (Re-editing) Bible (BSI)

Israel ghinyi miwi Khangyalo kekhie

¹ O Anyiza, ceen nben lalo; nkulila nben lalo, Nhhaighü nsa nben lalo!

² Ghangchilo! Nghinyithu na kivvü bendha, nu no n-ghangmvu ketenthu na no matang bendha.

³ Mathu na n-nyithu matangle kekuthi wina acho kiden bendha; no mathu khwe ketenthu matangle kekuthi cho kiden bendha.

⁴ Mathu na khi, “Gholo, ithu na mathu mizza ha yasa cü nalo, isanu Israel ha pi anuphanla mali thsüa nalo.”

⁵ Mathu na kekuli kekiden wi tsü mathu jühkesütan sayadha, nu no shunle ashusaya:

⁶ Edom nu Ismael; Moab nu Hagar nyithu;

⁷ Gebal, Ammon nu Amalek, nu Filistia nu Tur nyithu.

⁸ Assiriya la mathu saghuya, Lot shicüthu Ammon nu Moab nyithu zükeqhe ashu sayadha.

⁹ No Kishon Ghaku wi Sisera, Jabin nu Midia nyithu miwi kuli kechi ti mathu miwi kuli chilo.

¹⁰ No Endor wi mathu miwi khangya, nu mathu kamangthu na ayyi wi bighea.

¹¹ Oreb nu Zeeb manyi miwi kuli kechi ti mathu ccülikesathu miwi kuli chilo; Zebah nu Zalmunna miwi kesa ti mathu miwi kekhang kesenthu tsüdi miwi khangya cülo,

¹² Manyi khi, “Ithu Anyiza yyiwa tsü khupi ithu ji sa yaden.”

¹³ Ayyinikhu ti mathu pazighe cülo, O Anyiza, ameghü na amatsi mo pi bvü keten tsüti.

¹⁴ Anni na ayinong mecang, ayyishiphon wi anni na qhe keben ti,

¹⁵ Caghamo sho pi mathu jügü, nu ameghü nkemehai sho pi pateqhe cülo.

¹⁶ Kejüghekeya pi mathu mmi whengbhon cülo, O Apvüwa, nu mathu yala no kekhang tsü chüya thsülo.

¹⁷ Mathu yala anuphan wila nyu ncha, nu messi ntsa sa thsülo; Mathu ya anyankinyen nu shü thsülo.

¹⁸ No ketan Apvüwa le kesa mathu la chükeyawa sa, ayyi tsüdi miwi kekhang kesen kedi ntsawa.