ZAKECI 80 - Kemethajüh (N) (Re-editing) Bible (BSI)

Mizzatentiwa Sapfünengkeya ghena Kekhie

¹ Ithu kekhie kina chilo, O Israel kehiewa; ithu hhai kina chilo, anenithu kessiwa. Cherubim miwi no kadipen wi donki kebenwa,

² Efraim, Benjamin, nu Manasseh mizzathu wi no ketanla no pi ccüca chilo. No kezü pi ithu ccüca chilo; ghola ithu hangsha cülo!

³ Ithu ssinu kheneng gholo, O Anyiza! No nanketizen pi ithu ccüca chi, isathu ithu hangsha yaden!

⁴ Matsü khathu, Apvüwa Kekhang ntsawa Anyiza, no n-nyithu kekhie tsüghena nlebentsu ben ten nu?

⁵ No aleben gükeccü pi ithu ya dsa thsü, anyontssü pi ahyi keti wi chi pi ithu ya jjü thsü.

⁶ No ithu ketekevü kahang mizzatentithu ya ithu yyi wi kesali thsü; ithu ghinyithu na ithu nkekhichi sa.

⁷ Ithu ssinu kheneng gholo, Kekhang ntsawa Anyiza! No nanketizen pi ithu ccüca chi, isathu ithu hangsha yaden!

⁸ No Ejipt wina kemeshentsse ton sen shhugho; no mizzatenti kepathu jügüshi nu tsüpi mathu yyi wi yangchi.

⁹ Tsü ya shigü thsüle kesalina no apen satemetha chi; ma ghazanthu na ayyi kedhu wi duya, nu ayyi maben wi shigü bhonya.

¹⁰ Tsüwa tsüna ma kekhwen pi yyishiphon wheng bhonya; ma cünathu na sedar ton ketikesie tsü kwenshaya.

¹¹ Tsüwa tsüna ma cünathu chang sen nu Mediterranean Tssükedone, nu Eufrat Ghaku kecu la wa.

¹² No mangkesa na ghapeng-vü ketheng tsü yasa nu? Khili tsü anyi thowa na tsü pvüdhi wa khe ma bithu tsü ghanfü;

¹³ Asütithu na tsü cücha, nu aghangsathu na tsüpi mathu tsse sa.

¹⁴ Ithu wi kheneng gholo, Kekhang ntsawa Anyiza! Tang wina ithu ghang chilo; ghola n-nyithu hangsha yalo!

¹⁵ Ghonu no pi yang kechi kemeshentsse ton tsü hangsha yalo, maton kaghani no ma sapi zükeqhe shigü thsü kesawa ha!

¹⁶ Ithu ghinyithu na anni pi tsü mecang nu shüchidha; nlebenketsu wina mathu ghangchi nu yasa cülo!

¹⁷ No kessiya kesa n-nyithu tsüpi noncca nu khwe cülo, no sapi zü kecü mizzatentiwa tsü.

¹⁸ Ithu na khiela no wina kheneng bvü nbendha; ithu ya hangya thsülo, isathu ithu no sengden.

¹⁹ Ithu ssinu kheneng gholo, Apvüwa, Kekhang ntsawa Anyiza. No nanketizen pi ithu ccüca chi, isathu ithu hangsha yaden.