ZAKECI 77 - Kemethajüh (N) (Re-editing) Bible (BSI)

Ahathakina tsü wi aleben satekecca

¹ Hi misikhhali magha pi Anyiza wi chi; hi misikhhali magha chi, nu ma ihhai zaya.

² Agükeccü tsü wi hi Apvüwa wi khie; aghaja thangthang hi ikwen zanki nu kekhie sa, isala ileben sateccakeya mu meya.

³ Hi Anyiza meshen pi dhu kechi wi, hi ihatha tontiwa shhu; hi meshendhu kechi wi, hi iccükwenshü wa.

⁴ Ghaja thangthang wila hi ya njen thsü; hi ihathana ntsa sa nu ajüh la khi meyala.

⁵ Hi wakesa tsathangthu tsü meshen, nu kheni amapi wakesathu tsü meshen.

⁶ Hi pala meshen pi dhu ntsa nu aghaja tsü ya wa thsüa; meshen nu hi ketanla hi keü.

⁷ “Apvüwa na keshüthangla ithu meya mvula ten kwe? Ithu ma kenen saneng meyachadha kwe?

⁸ Ma ithu nghali ladha kwe? Ma jühkhishi kechi tsü n-nie ladha kwe?

⁹ Anyiza na ketizenwa tsü malidha kwe? Ma ghekepvüwa tsüna ma nanketizen kuti sayadha kwe?”

¹⁰ Ciwi hi khi, “Hi patena ntsa ketenwa tsüna ha— Anyiza na ma kekhang nmidha le kesawa tsü.”

¹¹ Hi no kekuli kedithu tsü meshen ben den, Apvüwa . No wakesa wi amankesa kuli kechithu tsü meshen neng ben den.

¹² No kuli kechithu tsü hi meshen ben den. No kekhang kekulithu tsü hi meshendhu chiden.

¹³ O Anyiza, no kuli kechithu tsüdi methale. Acenpvü kepa wi kesütanla no ti kesa nmi.

¹⁴ No amankesathu kuli keten Nyizawa. No kekhang pi mizzatentithu ccücachi.

¹⁵ No kekhang wina n-nyithu hangshaya, Jacob nu Josef shicübvüghathu tsü.

¹⁶ Atssü na no mukeya wi, O Anyiza, mathu messi wa, nu atssükedone kedhu na kedheggü wa.

¹⁷ Akulukeshü na atsankegho pi keshushachi; atssan wina atsanshigü nu atsancwe na ayyi ccügwen tsüdi wi wa.

¹⁸ Atsankeshigü tsüna llusen nu shhugho, nu atsancwe kewegü tsüna ayyi wi wegüchi. Ayyi na kedheggü nu kuli.

¹⁹ No atssükellu wi alentsen. No atssükedone kedhu tsü pvüdhi, isala ncükhathu nmu.

²⁰ No anenikehiewa kesü ti n-nyithu ssi, Mosa nu Aaron manyi ya aliwa sa.