ZAKECI 76 - Kemethajüh (N) (Re-editing) Bible (BSI)

Anyiza Na khangkeyawa

¹ Judah wi Anyiza tsü chüben; Israel wi ma nyan tsü nyuwaküden.

² Ma Jerusalem wi ma jjen na ben; ma Zion yikha wi hangden.

³ Ciwi ma ghinyithu lakusü, mathu tsonhithu nu njünnu, anle, mathu ghighethu tsüdila yasa.

⁴ No mangtila anyanthang nu, O Anyiza! No ayikhathu wi no nkenanmvu nyi miwi khangya nu kheneng gho keten tsüna khatila ghang pi ajenben nu!

⁵ Mathu kempvüza süpahithu kwen wi keben tsüdila khuyadha, nu mathu khilitsü keshüthu kejen wi tsü jenwadha; mathu kezü nu kesachü tsüdila ma men nmi.

⁶ No mathu patemessi kechi wi, O Jacob Nyizawa, goruthu nu tsüthu miwi donki kebenthu na khulidu shüa.

⁷ Isala, Apvüwa, tsüdila no messi. No nghepvü keben wi thola nkete wi ngan meya.

⁸ No tang wi jühkekaghaten pi kechü tsü wi; ayyiwa na messinu ceen ben wa.

⁹ No ajühkekaghaten tsüpi khichile ngan keshagha wi, ayyi wi nyu ma pasha ketenthu tsüdila hangshaya.

¹⁰ Anyithu lebenketsuwa tsüna no seng kayiya thsüden; aghi wi hangkeyathu na nkhowa tsü kinyiden.

¹¹ No pi ma cüle njüh khishi kethengwa tsü pi Apvüwa Anyiza cülo; no wi keben mizzatentithu tsüdila ajuthu sen nu ma wi gholo. Anyiza na anyithu sapi ma messi thsüden;

¹² Ma kadinga kapvü ketenthu tsü satemeni cüden, nu kadimithu pateqhe cüden.