ZAKECI 74 - Kemethajüh (N) (Re-editing) Bible (BSI)

Mizzatenti Zanshikecü kekhie

¹ No mangkesa na ithu teshi pi hati sadha nu? O Anyiza. No anuphan n-nyithu miwi n-ghepvü benten kwe?

² N-nyithu meshen chilo, no kheni wina mathu kessikeyathu tsü, nyu magha sa keben wi hangshaya, nu ssigho n-nyithu sa keyathu tsü. No matsü kesü wi hang kesa Zion Yikha tsü meshen chilo.

³ Yasakhi kesa hathu miwi wa nanlo; ithu ghinyithu na Kekinyijjen wi pala tsüdila yasadha.

⁴ Nghinyithu na khangkeya wina no Kekinyijjen wi jisha; khangkeya zensu wina kekhangthsü zanki.

⁵ Mathu na achan kejeüthu na ampvü sen nu achantonthu shüchi keten ti kesa.

⁶ Mathu ampvü nu kejenjithu pi achan pi kezhütsithu tsü whengcha khia.

⁷ Mathu na no Kekinyijjen yasa, nu anni pi mecang; mathu na no kinyi keten penwa tsü nakhia.

⁸ Mathu na ithu pachapaghe cü mvu sa; mathu na ayyi wi kemetha pen tsüdi mecang chia.

⁹ Ithu kemetha mechantsi tsüdila nmidha; atusenjüh-kechüthu thola nmidha, nu hati kesa matsü ha khathu waten khe thola nchü.

¹⁰ O Anyiza, ithu ghinyithu na matsü khathu ithu nankeqhe benten nu? Mathu anuphan n-nyan kenyen benten kwe?

¹¹ Mangkesa na ithu nkiqa mvu ladha nu? Mangkesa nkwen pi nsengwa chiyadha nu?

¹² Isala no adechhü wina ithu Kadimiwa sagho, O Anyiza; no matsü kejon wi ithu hangsha cü.

¹³ No kekhangkezü wina atssükedone la gishüzighe, nu atssükedone ghassübvü li whengcha.

¹⁴ Leviathan li tsü pacha nu ma sa tsü pi ayyikeshü wi aghangsathu dsa thsüa.

¹⁵ No atssüdhegü kebvüpenthu tsü ya atssü bvüshhugho thsü; na aghaku khutithu tsü ngün thsüa.

¹⁶ No aghaja nu aghanan sachi; no asha nu aghani pi mathu pen wi ben thsüa;

¹⁷ no ayyi kentenwa tsü kiden chi; no mazu nu pathsü sachi.

¹⁸ Isala meshenchilo, O Apvüwa, nghinyithu na no nankeqhe, mathu na no nchü nu no n-nyuwa sa.

¹⁹ N-nyi kekiqa nkemithu tsü teshi pi mathu ghinyithu kedaggü nkemehai kwen wi chi nsala; meten-mesha keben n-nyithu tsü mali nsala!

²⁰ No ithu ssinu cenkethenjüh tsü meshenchilo. Ayyi kejang ccügwen tsüdi wi yasayala na bendha.

²¹ Nyu mathu nkhichi ketenthu tsüpi kejüghe meya thsüla; ketha-u nu kahhatu nyi yala no seng thsü.

²² No ketanla shaghaya, Anyiza, nu no ketanla nsheipi yalo! No nkechüthu na ghanan thangthang no nankeqhe keben tsü meshen yalo!

²³ Nghinyi ghekepvü kejisha tsü nmalila, no nankemeghüthu na nhandhila magha keben tsü.