ZAKECI 73 - Kemethajüh (N) (Re-editing) Bible (BSI)

LESÜSHEN KECHENG ( Zak 73—89 ) Anyiza Ketsatan

¹ Ntsakhiwa Anyiza na Israel nyithu aleben kemethathu tuwi mehaile.

² Isala hi kempvüza bhatagha zzi; hi kenondi nmila zzi

³ kepaghenanye hi Apvüwa ghena inyonsa, khathansha gheshighenawa ghena tsüdila mehaiwa keben hi tsü muya khe.

⁴ Mathu tsü kinaa ghena agüccü nsa; mathu na zü nu agwo mehai.

⁵ Mathu nyu kepathu ti ketizen nsa; agükeccü nyu miwi keben tsüna mathu miwi nmi.

⁶ Tsalina mathu kekapvü pi ayan ti meyan, nu yasayala pi athsümeni ti sa.

⁷ Mathu leben na nkemehai pi keshusha chi, nu mathu kemeshen wi gheshighena cho ghena dhamang ben den.

⁸ Mathu nyu nankeqhe nu ajüh nkemehaithu khi; mathu kapvü nu nyu kepasha tsü kiden ben den.

⁹ Mathu na tangwi kebenwa Anyiza khisa, nu kekapvü wina ahzathu pi ayyi wi anyi miwi chi,

¹⁰ isanu Anyiza nyithu lela khapeghe gho mathu na mangle khi khe lebenchi ntsa nu tsü nondi.

¹¹ Mathu khi, “Anyiza na mangla chü nben; Kemisintsawa mangla tsü bhashiya nben.”

¹² gheshighenathu na tsüti kesale. Mathu na kejonla ben nu keshüthangla jikayi muyaden.

¹³ Hi ketanla hi pi metha nu kesami nkesa ha mang men la nye kwe?

¹⁴ O Anyiza, no ghanan thangthang hi ya ketizen sa thsü; ghanen kaghapen no hi meten-mesha.

¹⁵ Keujüla hi tsüti khi lethu, hi n-nyithu kesü ti nkuli ladha.

^16-17 Hi sakeyishüthu meshen kevüli chi, isala hi no Kekinyijjen wi npi kedu chu tsüna ighena sa keya ji nye. Ciwi gheshighenawa miwi mangwa saden khe hi chüya.

¹⁸ No mathu pi kennichen pen wi chiaben, nu mathu ya keyasa wi khulidu thsüaden!

¹⁹ Wan nu mathu yasa; mathu na kemessi ntsa wi dua.

²⁰ Mathu na aman kesü ghanenwa wi shaghathu nmila keten tsüti kesale; O Apvüwa, mathu na nmiladen.

²¹ Hi kemeshen nmehai keben, nu ileben naa keben wi,

²² hi aghangsa kesü ti jeng; hi no chüshi meyala.

²³ Isala hi keshüthangla nkete wi ben, nu no ikwen zanya.

²⁴ No kesansijüh tsüpi ilentsütson, nu asakhen wi no kenyuwa wina hi ssiyaden.

²⁵ No nkenye tsü tangwi ishei mangwa ben nu? Hi no yaya lethu ayyi wi mangwa nmvu bendha nu?

²⁶ Hi kemeshen nu igwo nzü laya mehai, isala Anyiza na hi sa ketezüwa; ma hi anuphanla nsenthu keyishüwa tsüle.

²⁷ No teshi kesathu na dedi metsiden; ntu wi jühtsentsa nkesathu no mathu yasa cüden.

²⁸ Isala hi tsü Anyiza kete wi keben, nu Apvüwa Anyiza wi kekhwe muya, nu ma kuli kechi tsüdi pi thangchi kesa tsüna khatila amankesa nu!