ZAKECI 7 - Kemethajüh (N) (Re-editing) Bible (BSI)

Atsentsawa ghena kekhie

¹ O Apvüwa, iNyiza, hi khweya le no wi ghoden; hi keka ketenthu tsüdi kwen wina hi hangsha cülo,

² nyelethu mathu na ssensitemi ti hi ghan sen nu thola hi hangsha nkeya wi bvü tendha, nu ciwi mathu na hi zandhi-zangheaben.

^3-4 O Apvüwa, iNyiza, keujüla hi anyi kesü tuwi sazzi apvüshang matsa, nyelela ajjügi nkemi wi ighinyi mesa-mena — keujüla hi hathu ha sa lethu—

⁵ ighinyithu na hi keka gho nu hi ghanya, nu hi pathi pi kahangli nmila ayyi wi chi thsülo!

⁶ O Apvüwa, nleben ketsu wi shaghalo! ighinyithu leben keminuwa tsü ssikaghashenlo; shaghayilo, iNyiza, nu atsentsa ahzawa tsü pila khichilo. shagha hi kiqa cülo! No atsentsawa tsü ghang den,

⁷ tsalina anyi tsüdi ssigho no vüya, nu tang wina mathu miwi kekhang senyalo.

⁸ Anyi tsüdi jühkaghaten ketenwa tsüna no le. O Apvüwa, hi kenen wi ijühkaghakhi cülo; hi meshon benle kesa no chüben.

⁹ No ketsatan Nyiza nu ithu kemeshen kenmvu ghang ketenwa. Anyi nkemehaithu kekuli khen cü, nu kemehaithu kutimen sapi cülo.

¹⁰ Anyiza na hi kekhwewa; ma ma jühkina ketenthu hangsha yaden.

¹¹ Ketsatan wi ajühkaghakhi ketenwa tsüna Anyiza le, nu ma keshüthangla nkemehaiwa meshensa den.

¹² Keujüla anyi nkemehaithu na mathu lebenkhapeghe meya lethu, Anyiza na ma njünnu yiyha saya ben. Ma alamugho la zanfü pi mitsü yaden;

¹³ ma nyu pathiya kemehai ghitsanqaithu khuya, nu ma lakusü la pi mitsü yaden.

¹⁴ Ghangchilo, nkemehaithu na khatila nkemehai meshen; mathu na kekivvü kiden nu milikemesa kekuli saden.

¹⁵ Isala mathu na aca sapi nyu die ketheng witsü, mathu ketanla mathu yayaden.

¹⁶ Tsüti mathu nkemehai ghena kemeten muya, nu mathu keyasa kekuli ghena mathu ketanla mathu mesa-mena yaden.

¹⁷ Apvüwa na kemeshon ghena hi ma seng tenle, hi keseng khwithu sapi Kemisintsawa, Apvüwa saki den.