ZAKECI 69 - Kemethajüh (N) (Re-editing) Bible (BSI)

Kekiqa kekhie Nyunuti kesü

¹ Hi hangsha yalo, O Anyiza! Atssü na isun nten sadha;

² Hi anisha kedhu wi du tendha, nu ciwi ayyi tsen nmi; hi atssü kedhu wi benle, nu atssükullu na hi meyanthi tendha.

³ Kekiqa ghena kemagha wi hi kekhang la nmi, nu igiyan la naa wadha. No hi kekiqa kaghang ghena inyon la naa wadha.

⁴ Ma jjügi nkemi wi hi nanmeghü ketenthu tsüna ilissen miwi la jiki. ighinyithu na milikemesa khipi hi shun; mathu na zü ntsa nu hi pathi mvu ben. Mathu na hi nkaghanfü tsanqaithu tsü la pi cü neng thsüa.

⁵ O Anyiza, hi kesamithu tsüna ntuwi kuthi meya; hi mang khatila jeng khe no chüben.

⁶ Hi yala kejüghekeya sen ghola no nondi ketenthu miwi nchi thsüla, Kekhang kedi ntsawa Apvüwa! No kinyi ketenthu miwi hi yala kejüghekeya sengho chi thsü nsala, O Israel Nyizawa!

⁷ Tsüwa tsüna nghena nyu hi kimenni, nu kejüghekeya na hi whengbhondha.

⁸ Icünyuthu tuwi hi anyi nkechü nyi ti, nu itheghi tuwi hi asang kesü ti sadha.

⁹ Hi no kekinyijjen wi leben kechi tsüna imiwi anni ti mecang ben; no nkekhichi jühthu tsüdila imiwi qanca dugho.

¹⁰ Hi kezi wina hi satemeni, nu anyithu na hi kimenni.

¹¹ Hi anonkegü thsümenithu pvüthu, mathu na hi nankeqhe.

¹² Mathu na alentonti wi tsü icüki khi, nu adikinathu na icüki pi akhwi cü.

¹³ Isala hi tsü no wi khieden, Apvüwa; no ketanla matsü kessiya, nu hi luneng chilo, Anyiza. No kaghali kedi tsü ghena hi luneng chilo, kepaghenanye no hi hangshaya le ajüh khishikechi tsü nieden.

¹⁴ Anisha wi du keten witsü hi hangsha yalo; ighinyithu wina hi pi tsanqai cü, atssü kedhu wi tsü hi hangsha cülo.

¹⁵ Atssüketi tsü yala imiwi ngho thsü lalo; atssü kedhu wi hi yala meyanthi nyelela ashüjjen wi du thsü nsala.

¹⁶ Hi luneng chilo, Apvüwa, no ghaliki keten kemehai wina; no nanketizen keti tsü ghena hi wi khapeghe gholo!

¹⁷ Nmaghawa nkuthi lalo; hi agükeccü keti wi bendha— khili hi luneng chilo!

¹⁸ Hi wi gho hi hangsha cülo; ighinyithu wina hi hangsha cülo.

¹⁹ Khati hi kimenni, khatila hi kejügheya ben khe no chü; nu ighinyithu tsüdi muben.

²⁰ Nkekhichi kekuliwa tsüna ileben pacha, nu hi kaghang nkemi wi bendha. Hi nantizen kecü ghang isala thola nmi; leben satekecca bha isala thola mu meya.

²¹ Hi ghama keben wi mathu na aji pi hi cü; hi dighe keben wi mathu na kessetsü pi hi jjü thsü.

²² Mathu tsü yala mathu yasa kesawa sa; mathu ghena kemetha kemishu wina mathu keqanca mukeyawa sa.

²³ Mathu ya pala nmu thsü lalo! Mathu geshi sapi nkhang thsüla!

²⁴ Nleben ketsu pi mathu miwi keshusha chi; n-ghekepvü yala mathu yaya thsülo.

²⁵ Mathu keben penthu tsü yisha kesawa sa, anyithu la mathu nithsüjjen wi nhangla kesawa sa!

²⁶ Mathu na no kemeten pi kecüthu tsü meten-mesha; mathu na no mesa-mena cü kesathu ketizenkesa cüki khi.

²⁷ Mathu kesamithu tsüdila pi zhü yalo; no hangshakeya wi tsü mathu ji mangla nmi thsüla.

²⁸ Kahang lesüshen wi mathu nyan nyen pi kesawa sa; n-nyithu nyan pi saghu ketheng wi tsü mathu pi nchila kesawa salo.

²⁹ Isala hi kinaa nu kaghang nkemi wi bendha le, O Anyiza; hi pieki cü nu hi hangsha yalo!

³⁰ Hi akhwi sapi Anyiza seng den; hi nkesengcha sapi ma cü nu ma kedi tsü pi thang chiden.

³¹ Hawa ha amesüsi pi Apvüwa kecü miwi ma kenen sayaden, amesü süpon kezügü pi ahhansha kesa miwi.

³² Nyu mathu nkhichi ketenthu na ha mukeya wina mathu nen ben; Anyiza kinyi ketenthu kechü-kenong yaden.

³³ Apvüwa na kahhatuthu hhai kina den, nu ma nyi atssüzüjjen wi kebenthu tsü mali nten.

³⁴ Anyiza senglo, O atssan nu ayyi, atssükedone nu ciwi kahangthu tsüdila.

³⁵ Ma Jerusalem hangsha yaden nu Judah nyunutithu sapfü neng cüaden . Ma nyithu na ciwi hang nu ayyiwa tsü nka yaden.

³⁶ Ma magha shicübvüghathu tsü yayaden, nu thowa na ma ghaliten khe tsüthu na ciwi hang yaden.