ZAKECI 65 - Kemethajüh (N) (Re-editing) Bible (BSI)

Keseng nu Nkesengchakesa

¹ O Anyiza, ithu na Zion wi ben nu no keseng tsü kesau le, nu ithu jüh khishikechi tsüpi no kecü-u le.

² Kepaghenanye no ithu kekhie luneng cü den. Apen tsüdi wi anyithu na

³ mathu kesami ghena no wi ghoden. Ithu kesazzi na ithu pasha den, isala na tsüthu teshi cüden.

⁴ No kessiya kesathu nu no ssigho kekinyijjen wi hang thsü kesathu na kemihhi ntsa. No kemetha kekinyijjen wi kesawegüthu, nu njjen wi pala kemehai kebenthu tsüpi ithu nonkwenyaden.

⁵ No ithu kekhie keluneng wina khangkeya pi ithu cüle nu ithu hangshayale kesalina amankesathu kulichi. Ayyi wi anyi tsüdila nu atssükedone khhaka wi kebenthu tsüdila na nondi den.

⁶ No kezü wina ayikhathu tsüpi mathu pen wi ben thsü, nu no kekhang pi ccüca chi.

⁷ No atssükedone kaghamo nu atssükullu hhai; nu anyi kemagha hhai la khasha cüden.

⁸ No pala kedi kuli kechithu tsü ghena ayyi maben keqhethiketen sa. No kekulithu na ayyi katen kesü wina wa pahanwa wi nonkeghe kemagha hhai sen gho.

⁹ No atsankegho kesun chi nu ayyiwa noncca keten pi ccüca; no tsü sapi benya nu mehaiya thsü. No atssü pila aghakuthu pong cü; no yangdsaketenthu pi ayyi pong cü. No hati kesa kuli chiden:

¹⁰ Alli chhü ketheng wi tsü atssüpi meshu-mena sa cü, nu ayyiwa yala atssü tsenya thsü; nu atsangho pila ayyi satecca cü nu aghanglanithu tsü yala shigü thsü.

¹¹ No kemehai na khatila apvükeya pi ithu cü nu! No khiewa wa khe ciwi meshu-mena saden.

¹² Aghang kemejjü pen witsü khaghanenithu na pong ben; Ayyishiphon witsü anonkeghe na pong ben.

¹³ Alli witsü khaghanenithu na pong ben; ayyiketijü witsü awhengsu na pong ben. Pala tsüdila anonkeghe wina magha nu akhwi saben.