ZAKECI 64 - Kemethajüh (N) (Re-editing) Bible (BSI)

Kekhwe ghena kekhie

¹ Hi agükeccü wi ben le, Anyiza, hi kekhie kina cülo! Hi ighinyithu messi ben le, hi hangsha cülo!

² Gheshighenawa cho nkemehai nu anyi nkemehai tenti ja wina hi khwe cülo.

³ Mathu na njünnu ti mathu mili yiyha sa nu kedeggü jühthu pi alakusü ti pi mitsüya.

⁴ Mathu lebenzza nu nyu ghükesa wina anyi kemehaithu yasa den.

⁵ Mathu nkemehai cho kekiden witsü khokho kechü-kenong den; mathu na abhitsüthu pi khiewa lla nu kesa meshen nu kiden benten. “Thola tsüthu tsü mu nben,” mathu isa khi.

⁶ Mathu kekuli nkemehai kiden nu khiden, “Ithu ayen yasaya kemehai kesü kidenyadha.” Anyi leben nu kemeshen tsüna chüshiya nten.

⁷ Isala Anyiza ma lakusü pi mathu ga cü, zuli mathu mesa-mena cüa.

⁸ Ajüh tsüthu ghena ma mathu yasa cüden; anyi mathu kemu tsüdila mathu li ketheng den.

⁹ Mathu tsüdila messi den; mathu na Anyiza kuli kechi tsü meshen nu ma kekulithu tsüpi khiden.

¹⁰ Apvüwa na kuli kechi ghena ketsatan nyi tsüdila anonghe den. Mathu ma wi kemessi nkemi muya den; kemehai nyi tsüdila ma seng den.