ZAKECI 62 - Kemethajüh (N) (Re-editing) Bible (BSI)

Anyiza wi aghikehie Kenondikeben

¹ Hi ileben tisie nu Anyiza hi hangshakeya hie; Hi ma ketan maghaki ben den.

² Ma ketan hi khwe nu hangsha cüden; Ma isheikepiwa nu hi khiela nyu nchala sa nben.

³ Nthu na matsü khathu anyi ma kezü nmila kaghapeng keqanca ti kesa ha matang le ben nu?

⁴ Nthu na kenyuwakü pen wina ma zansha cü mvu saden; nthu na milikemesa tsü nenden. Nthu na nyu sawegü kecü jüh khiden, isala nthu leben wi ma kishencü den.

⁵ Hi Anyiza ketan maghaki ben den; hi hi kaghang pi ma miwi chi den.

⁶ Ma ketan hi khwe nu hangsha cüden; Ma isheikepiwa nu hi khiela nyu nchala meyacha.

⁷ Hi hangshakeya nu nyuwakekü na Anyiza kemeshen ketan; ma ikhweti kezüwa; ma hi ken-niepenwa.

⁸ Matsü tsüdi wi Anyiza nondi tenlo, inyithu. Nthu gükeccü tsüdi pi ma kizalo, kepaghenanye ma ithu ken-niepenwa.

⁹ Anyi ha tsüdila ahatha kekissa ti kesa; kedi le kiza lela ma men nkemi makesü. Mathu pi kewhuchan wi chi nu whu wathu mathu na mangla nye le; mathu na ahatha kekissa miwi mbhiki.

¹⁰ No kenondi pi yasayala miwi nchila; nyu ji keteng ghena kekiyi muyaben kesa tsü n-nondila; keujüla no keben jikayi shagha lela, tsüthu tsü maghaki nsala.

¹¹ Kejon tughula hi Anyiza na kekhi zaya, kekhangwa tsüna ma ji,

¹² nu ma kaghaliwa tsüna benki ben den. O Apvüwa, no no ketanla, anyi kesüsü ma kekuli qe wina akutimen pi cüden.