ZAKECI 59 - Kemethajüh (N) (Re-editing) Bible (BSI)

Hangshakeya ghena kekhie

¹ Ighinyithu wina hi hangsha yalo, iNyiza; hi matang ketenthu wina hi khwe yalo!

² Anyi nkemehaithu wina hi hangsha yalo; nyu kepathithu wina hi hangsha cülo!

³ Ghangchilo! mathu na hi pathiale hieben; anyi nkemehaithu na hi matangle saghu bendha. Hawa ha hi kesami nu kesazzi ghena nye,

⁴ hi kepazzi ghena la nye, O Apvüwa, tsalina mathu kaghajila mathu pen wi wa.

⁵ Shaghalo, Apvüwa, Anyiza Kekhang ntsawa, nu hi kekiqa ghena gholo; No ketanla ghangchilo, Israel Nyiza! Shagha nu no nkechüthu meten-mesha cülo; nyu ghan pi jeü ketenthu ntizenla!

⁶ Mathu na minulen wi kheneng gho, mathu na affü ghekina ti anyunutiwa witsü kegoeden.

⁷ Mathu nyu nkekhichi nu nyu kepateqhe jühthu tsü kina chilo. Mathu mili tsüna mathu pang wi njünnu ti kesa, isala thola mathu hhai nzale kesa meshen den.

⁸ Isala no mathu nankeqheden, Apvüwa; No no nkechüthu tsüdila kimenniden.

⁹ No kezü wi tsü hi kenondi ben; No hi ken-niepenwa, O Anyiza.

¹⁰ Anyiza na hi ghaliden nu ma hi wi ghoben; ma hi yala ighinyithu nyu nchala kesa tsü mu thsüden.

¹¹ Mathu npathi lalo, O Anyiza, inyithu na malithu keyishü ghena. No kezü wina mathu jügüzighe, nu mathu miwi khangya cülo, O Apvüwa, ithu khwe ketenwa.

¹² Kesami na mathu pang wi ben; mathu jüh tsüdila kesami; mathu kekapvü wi mathu ghanya kesawa sa! kepaghenanye mathu nyu kishencü nu milimesa,

¹³ nleben ketsu wina mathu yasa cülo; mathu yasatha sa cülo. Isathu anyi tsüdila Anyiza na Israel miwi kekhang senden nu ma kekhang na ayyi tsüdi wila waben kesa chüyaden.

¹⁴ Ighinyithu na minulen wi kheneng gho, mathu na affü ghekina ti anyunutiwa wi kegoeden,

¹⁵ affü na mathu tsse ghena kegoe nu kedsa qo nmula aghena keten ti kesa.

¹⁶ Isala hi no kezü khwi saden; ghanan kaghapeng wila no ghaliki keten khwi misikhhali saden. No ighena ken-niepenwa, igükeccü tsü wi hi kekhwewa.

¹⁷ Hi no seng tenle, isheikepiwa. Hi ken-niepenwa tsüna Anyiza, hi tizen ketenwa Anyiza.