ZAKECI 58 - Kemethajüh (N) (Re-editing) Bible (BSI)

Anyiza na gheshighenathu meten-mesha cülo kekhie

¹ Nthu kekhang kesenthu atsentsa wi südhekeya tsü khuchi ten kwe? Nthu kemeshon wina anyi jühkaghakhiten kwe?

² Nye! Nthu na nkemehai kuliya kemehai tsü ketan meshen den, nu ayyiwa wi yasayala kesazzithu tsü saden.

³ Anyi nkemehaithu na mathu kahang tsüdi wi kesazzi tsü ketan sa sen nu wa den; mathu kepvügha ghanan wina milikemesa tsü khi.

⁴ Mathu na amaghangthu ti aji pi pong pvüben; mathu khuna kisha na kobra khuna kedechu,

⁵ amaghang kessithu hhai za nketen ti, nyelela chukemehai kedemawa hhai za nketen ti kesa.

⁶ Ae, nkemehai ssensitemithu yha tsü pacha cülo, O Anyiza.

⁷ Mathu ya atssü lle bvü keten tsüti nmu thsüla; alen wi kepaghathu ti mathu cücha thsü kesawa salo.

⁸ Mathu ya accünen na wa sen nu tssüghe pvü keten ti sa thsü; mathu ya meme ma keshü pvügha, nu kewegü nkemu tsüti sa thsü kesawa salo.

⁹ Mathu ha npi kechü wina akepaghathu ti mathu pathi pi; mathu hangkeben wina Anyiza na ma lebentsu, nu mathu mo pi khala cüden.

¹⁰ Kesamithu meten-mesha kesa mukeya wi, ketsatanthu na mathu nonghe den; mathu alentsen sen nu gheshighenathu jjü tsü pvüdhiden.

¹¹ Anyithu na khiden, “Ntsakhiwa ketsatanthu na akutimen muyadha; ntsakhiwa Anyiza na ayyi jühkaghakhiden.”