ZAKECI 57 - Kemethajüh (N) (Re-editing) Bible (BSI)

Kekiqa ghena kekhie

¹ Hi nantizen cülo, O Anyiza, nantizen chilo, kepaghenanye hi no hangshakeya wi ghoben le. Caghamo nkemehai npi kecen chu hi ngisha kekhu wi tsü n-nie yaden.

² Hi Kemisintsawa, Anyiza cichi, hi nsenthu keyishü tsüdi pi hi cü ketenwa, Anyiza.

³ Ma tangwi ben nu hi lunengchi nu hi hangsha cü; Ma hi pasha ketenthu miwi khangya den. Anyiza na ma ghaliki keten nu atsentsawa tsüpi hi ccüca chiden.

⁴ Ighinyithu na hi vüyadha, mathu na anyi sa dsaketen ssensitemithu ti kesa. Mathu yha na apie nu alakusüthu ti; mathu mili na njünnu yiyha ti kesa.

⁵ O Anyiza, atssan wi no kedi nu n-nyankethang tsüpi anyi tsüdila ccüca chilo.

⁶ Ighinyithu na hi ghanyale kesalina kaghanthsü pi shighe theng; aleben gükeccü na imiwi khangyadha. Mathu na ilen wi ayyiku chhü, isala mathu ketanla ciwi khuli dua.

⁷ Hi nondi ntsa ben, O Anyiza; hi akhwi sapi no seng den!

⁸ Shaghalo, Ighamu! Shaghalo, hi harp nu lair! Hi aghani pamechü chiden.

⁹ Hi anyithu jawi no seng den, O Apvüwa, hi mizzatentithu jawi no seng den.

¹⁰ No ghaliki keten tsüna tang kebenthu la cu; njühtsentsa tsüna atssanthu la kidhenben.

¹¹ O Anyiza, atssan wina no kedi, nu n-nyankethang tsüpi ayyi tsüdila ccüca chilo.