ZAKECI 56 - Kemethajüh (N) (Re-editing) Bible (BSI)

Anyiza wi Kenondi keben kekhie

¹ Hi nantizen cülo, O Anyiza, kepaghenanye nyu na hi matang bendha; Ighinyithu na matsü tsüdi wila hi meten-meshaben.

² Ghanan thangthang wila hi ssikaghashen ketenthu na hi matang. Hi ssikesali nyi na ji mtsüdha.

³ O Kekhang ntsawa Apvüwa, hi messi keben wi hi kenondi pi nmiwi chi.

⁴ Hi Anyiza nondiden nu hi messi meya; Ma jüh khishikechi tsü ghena hi ma seng. Anyi melewa kesü na imiwi mangwa saya mehai nu?

⁵ Ighinyithu ghanan thangthang wi hi kekivvü kiden; mathu na keshüthangla khatinu hi patena cünu kesa meshen ben den!

⁶ Mathu na kekuthi pen wi saghuya, nu hi kekulithu tsüdila cwen, hi pathiya benshe kesa ghang.

⁷ Mathu meten-mesha cülo, O Anyiza, mathu nkemehai ghena; Nleben ketsu wina mathu miwi khangya cülo!

⁸ Hi khati igüccüdha khe no chüben; No ihacükeca tsüpi zhütheng. Tsüthu tsüpi nlesüshen wi zhü ntheng kwe?

⁹ Hi no cikechi ghanan wi, ighinyithu na khapeghe bvüaden . Hi ha chüben, Anyiza na hi wiwa ben—

¹⁰ Apvüwa, hi ma jüh khishikechithu nondi ketenwa tsü.

¹¹ Hi ma nondiden nu hi messi meya. Anyi melewa kesü na imiwi mangwa saya mehai nu?

¹² O Anyiza, hi ijüh khishi kethengwa tsü pi no cüden; hi nkesengcha tsüpi no cüden.

¹³ Kepaghenanye no keshü wina hi hangsha cüdha, nu nyu nkecha wina hi pi tsanqai cüdha. Tsalina hi Anyiza ketepen wi ben den nu hang kebenthu miwi wegü ketenwa kewegü witsü.