ZAKECI 53 - Kemethajüh (N) (Re-editing) Bible (BSI)

Anyi gheshighena

¹ Kejüphonthu na mathu ketanla mathu wi khiden, “Anyiza nmi.” Mathu tsüdila hang nmeshon, nu keqhethiketen kesa kekulithu sadha; ciwi anyi kesütanla kemeshon kekuli nyi nmidha.

² Anyiza na tangwi ben nu anyi hang kebenthu na kesütanla metsa nu ma kinyitenla nye khe ghang.

³ Isala mathu tsüdila khapeghe bvüdha; mathu tsüdila nkemehai makesü. Mathu kesütanla kemeshonwa kekuli nyi nmi, kesütanla nmi.

⁴ “Mathu na nchü kwe?” Anyiza na keü. “Nkemehai kekulithu mathu na nchü kwe? Mathu na inyithu ji teng sen nu hang, nu hi wi kekhie la sa nten.”

⁵ Isala mathu na kheni tsüti npi kesa ghena mathu keqhethi kidenya tendha, kepaghenanye Anyiza ma nyi ghinyithu güthu tsü pazigheaden. Anyiza na mathu meya mvu ladha, nu tsüghena Israel yala mathu miwi khangya thsüaden .

⁶ Zion wina khangkeya Israel miwi gho thsüle kesalina hi khatila kekhie sa nu! Anyiza na mathu yala mehai neng keya tsüwi Israel nyithu na khatila anonghe ten nu!