ZAKECI 52 - Kemethajüh (N) (Re-editing) Bible (BSI)

Anyiza Jühkekaghaten nu Nanketizen

¹ Mangkesa na no nkemehai tsüpi kapvü ten nu, anyi kekhangwa? Anyiza na anuphanla atsentsa wi ben den.

² No nyu yasa cüle kesalina kiden ben den; nmili na alliseng kedighe ti. No keshüthangla milikemesa tsü bhashi ben den.

³ No kemehaiwa miwi nkemehaiwa ghali, nu atsentsa miwi milikemesawa ghali den.

⁴ Milikemesawa, no njühthu pi nyu patena kesa tsü no nenden!

⁵ Tsalina Anyiza na anuphanla no yasa cüden; Ma no ghanya nu njjenku wina no zanshi; ma kahang yyi wina no khupiaden.

⁶ Gheshighenathu na ha muya nu messiden; ciwi mathu na no nankeqhe nu khiben,

⁷ “Ghangchilo, anyi hawa ha keyazi ghena Anyiza wi maghaki nten, isala ma keben-keyeng nondi, nu gheshighena wi keyaziwa tsü ghangden.”

⁸ Isala hi tsü Anyiza jjen wi oliv-ton na shigü keben ti kesa; hi anuphan nu anuphan wila ma ghaliki keten tsü nondi.

⁹ Hi keshüthangla no kuli kechi tsü ghena no nkesengcha saden, Anyiza; n-nyithu keben pen wi hi no mehaile kesa pi thang chiden.