ZAKECI 51 - Kemethajüh (N) (Re-editing) Bible (BSI)

Kesami Teshikecü kekhie

¹ Hi nantizen cülo, O Anyiza, no ghaliki keten tsü ghena. No nanketizen keti tsüwa tsü ghena hi kesami nyen pi cülo!

² Hi nkemehai tsüdila bhu metha, nu hi kesami wina hi sametha cülo!

³ Hi hi kepazzithu tsü chüben; hi matsü tsüdi wi hi kesamithu tsü meshenki ben.

⁴ Hi ntuwi sazzidha —ntuwi ketan sazzi — nu no nmehai le ketenwa tsü kulidha. Tsalina no ijühkekaghaten hawa ha meshon le; no hi kemeshensa hawa wi no kesazzi nmi.

⁵ Hi pvüghakeya tsathang nten na hi nmehaile; hi npvükeya tsü nten na kesami nyile.

⁶ Apinonketsü nu atsentsa tsüna no yamvu ketenwa tsüle; no kemetsa tsüpi hi pong cülo.

⁷ Hi kesami khupi cülo, isathu hi metha yaden; hi kizü metha cülo, isathu hi aghola miwi miki yaden.

⁸ Hi ya anonkeghe nu kenong hhai tsü zaya thsülo; nu no hi pacha nu pakhhi lela, hi kheneng matsü kesü inonghe yaden.

⁹ Hi kesamithu wi n-nyon kemabhon ya, nu hi nkemehaithu tsüdila nyen cülo.

¹⁰ Imiwi aleben kemetha sachilo, O Anyiza, nu ajühkeya ghamu pi hi cülo.

¹¹ No ketenpen wi hi jügüshi nsala; imiwi no kemetha ghamu sen bvü nsala.

¹² No hangshakeya wi anongheya ketenwa tsü pi hi cü neng chilo, isanu hi ya njühkina mvuthi saya thsülo.

¹³ ciwi hi n-yenkhukechi tsüpi kesamithu sansiden, nu mathu kheneng no wi ghoaden.

¹⁴ O Anyiza, hi kahang khushichi, nu hi hangsha cülo, nu hi nongthi sala no ketsatan tsüpi thang chiden.

¹⁵ Hi kiqa pi ajühkhiya thsülo, Apvüwa, isathu hi no seng ten le.

¹⁶ No ahhansha kesathu tsü yamvu nten, nyelethu hi tsüthu khuchi kesa; no mecang pi kekinyi tsü la nen nten.

¹⁷ O Anyiza, ihhanshawa ha satekimeni ghamu le, no satemeni nu leben khapeghe kesa tsü meya mvu sa nben.

¹⁸ O Anyiza, Zion tuwi ccatssü nu ma kiqa cülo; Jerusalem khwetithu tsü saneng cülo.

¹⁹ Isathu mehaitsü nu ahhansha sa kechi, ithu na mecang pi kekinyi sa kechiwa no nen den; nu kekinyipen wi amesü süponthu pi ahhansha saden.