ZAKECI 50 - Kemethajüh (N) (Re-editing) Bible (BSI)

Atsentsa Kekinyi

¹ Kekhang ntsawa Anyiza, Apvüwa na khi; ma nidu nu nishu wi ayyi maben cichi.

² Anyiza ma tsimehai cencu kesa na nyunutiwa Zion wina wegüchi.

³ Ithu Nyizawa na gho tendha, isala ceen kesa wina nye; annikeqhe kedeggüli na ma tuwi, nu caghamo nkemehai ma vü sen ben.

⁴ Ma ma nyithu jühkekaghaten tsü mu thsüle kesalina atssan nu ayyi cipi chüzathu sa thsü.

⁵ Ma khi, “Atsentsa wi inyi sa ketenthu, nu ahhansha kesa wi hi ssinu ajüh cenkethengthu tsü saghu pi hi cülo.”

⁶ Anyiza na tsatan nu anyi ghan-nan ketenwa le kesa atssanthu na pi thangchi.

⁷ “Kinalo, inyithu, isathu hi khichi den; hi no kematang khishichi tendha, Israel. Hi Anyiza, nthu Nyizale.

⁸ No keshüthangla ahhansha nu mecang pi kekinyi pi hi kecüthu tsü ghena hi no kha nten.

⁹ Isala hi nsahangthu jawi amesü süpon nyelela anenithu tsü nsenla mehai;

¹⁰ Agheja wi aghangsathu nu ayyishiphon hazar wi amesüthu tsüdila iji.

¹¹ Agheja wi awathu nu alli wi kahangli kebenthu tsüdila iji.

¹² ‘Hi ghama lela no wi kedsakejjü khie nben, kepaghenanye ayyi nu ciwi kebenthu tsüdila iji.

¹³ Hi amesü süponthu sa tsü dsa nyelela anenithu jjü tsü jjü ten kwe?

¹⁴ Nkesengcha kesa tsüpi ahhansha sapi Anyiza cü, nu njüh khishikechi tsüdi pi kekhang ntsawa cülo.

¹⁵ Agükeccü kegho wi hi cichilo; hi no hangsha cüten isanu no hi seng den.’

¹⁶ Isala Anyiza na gheshighenawa wi kizala, ‘Mangsale no hi ayenkhukechi tsü khiben ten nu? mangkesa na hi cenkethenjüh tsü khiben ten nu?

¹⁷ Hi no satemeshon kesa tsü no nkina mvu saden; hi ayen khukechithu tsü meya mvu.

¹⁸ No kaghanfü nyi kemu tsüdi pi npvüshang sa, nu keqhezathu tsü ssi gweghe.

¹⁹ “No matsü tsüdi wila nkemehai kekhi kiden sen nu ben den; no khiela milikemesa khi kesüdu nten.

²⁰ No nkemehai pi ncünyuwa metsi-meni le kesalina kiden nu ma kesazzi tsü bhaden.

²¹ No pala hathu tsüdila kulidha, isala hi mangla nkhi, tsalina no hi la no ti le kesa meshen. Isala hi khili no kha nu ajjügi ha pi no chü thsüben.

²² ‘Ha kinayalo, nthu hi nkechü ghe sa ketenthu, nyelethu hi nthu yasa cüden, nu ciwi anyi thola nthu hangsha keya nmi.

²³ Nkesengcha tsüna hi kekinyikü ahhansha kesa, nu hi ntsakhiwa ijühkina ketenthu hangsha yaden.’