ZAKECI 49 - Kemethajüh (N) (Re-editing) Bible (BSI)

Keben nondi keten tsüna Kejüphon

¹ Ha kina chilo, anyi tsüdila! kinalo, apen tsüdi wi anyithu,

² Anyi kedi nu kizza, keban nu ketha-u lela gweghe.

³ Hi kemeshenthu na metha; hi kemetsa jüh khiden.

⁴ Hi hi kemeshen khapeghe pi kemetsa jühthu miwi chi nu hi harp kekhou wi ma jjügi khi mechan chiden.

⁵ Kemessi tsüwi la nu ighinyithu na hi vüya lela hi nmessi,

⁶ anyi nkemehaithu mathu keben nondi, nu mathu keben-keyeng ghena kapvü ketenthu na.

⁷ Anyi kesü ma ketanla ma hangsha meyacha; ma kahangli tsü ghena ma men pi Anyiza cü meya,

⁸ kepaghenanye kahangli men tsüna sayacha nben. Ma pi cüya kemehai mangla tsü ncen,

⁹ keshü ghüya, nu anuphan hangya thsüle kesalina.

¹⁰ Kemetsa nyi la shü keten tsü muya mehai, nu tsüti kejima le kejüphon lela. Mathu na mathu keben tsü teshi pi mathu shicübvüghathu cüaden.

¹¹ Mathu shüjjenthu tsüna anuphan mathu jjenwa; ciwi mathu anuphan ben den, kheni mathu yyi ben lela.

¹² Anyi ma kedi kekhang ghena keshü wi ma hangsha meya; ma la aghangsa ti shüaben.

¹³ Mathu ketanla mathu nondi ketenthu, mathu keben-keyeng wi anonkwen ketenthu asakhen wi mangwa metuten khe ghangchilo—

¹⁴ mathu khaghaneni ti shüaden, nu keshü na mathu kehiewa sa den. Ketsatan nyi na mathu miwi khangya den, mathu jjen temeja sen nu keshü yyi wi mathu gwo na wan bighea keten tsüti.

¹⁵ Isala Anyiza na hi hangsha yaden; ma keshü kekhang wina hi hangsha yaden.

¹⁶ Anyi kesü benkeya nu ma keben-keyeng ji kayi keya ghena nleben güccü nsala;

¹⁷ ma keshü ghanan wi ma tsü sen nu bvüya nben; ma keben-keyeng na ma shüjjen wi ma gweghe wa nben.

¹⁸ Keujüla anyi kesü kahang hawa wi anonkwenya, nu ma mehaikeya ghena nyu ma seng ben lela,

¹⁹ ma la keshü wi ma bamyithu gweghe ben wa ben, kejang na anuphan ben keten witsü.

²⁰ Anyi ma kedi kekhang ghena keshü wi ma hangsha meya; ma la aghangsa ti shüaben.