ZAKECI 47 - Kemethajüh (N) (Re-editing) Bible (BSI)

Kekhangkesen Kemisintsawa

¹ Anonghe nu nthu kwencen yalo, anyithu tsüdila! Akhwi misikhhali sapi Anyiza senglo!

² Apvüwa, Kemisintsa tsü messilo; ma kekhang ntsa kadimiwa, ayyi tsüdi miwi kekhang senden.

³ Ma anyithu miwi khangkeya pi ithu cü; ma ithu pila mizzatentithu miwi kekhang sen thsü.

⁴ Ma ithu na hang keben ayyiwa ha kessi chi, ma nyi ma ghali ketenthu ghena kapvü keten yyi hawa ha.

⁵ Anyiza na ma kadipen wi kiya. Apvüwa na ciwi kiya meyi anonkeghe kemagha nu tutuwa kekhou hhai zaya.

⁶ Akhwi sapi Anyiza sakilo; akhwi sapi ithu kadimiwa sakilo!

⁷ Anyiza na ayyi tsüdi miwi kadimiwa; akhwithu sapi ma senglo!

⁸ Anyiza na ma kemetha kadipen wi donkiben; ma mizzatentithu miwi kekhang sen.

⁹ Mizzatentithu miwi kekhang kesenthu na ghola Abraham Nyiza nyithu ssinu saghuya. Ma süpahizi tsüdi miwi khangki; ma kemisi ntsa wi kekhang sen.