ZAKECI 46 - Kemethajüh (N) (Re-editing) Bible (BSI)

Anyiza na ithu ssiden

¹ Anyiza na ithu kekhwewa nu kezüwa, agükeccü tsüwi nu keshüthangla kiqa cüle kiden ben.

² Tsalina ithu messi meya, keujüla ayyi na kuli, nu ayikhathu na qanca sen nu atssükedone kedhu wi du lela;

³ keujüla atssükedonethu ghamo nu kethou shhugho nu yasayala wi ayikhathu zankeju lela.

⁴ Ciwi aghaku kesü anonkeghe sengho Anyiza nyunutiwa wi, Kemisintsa kemetha jjen wi tsü chiden.

⁵ Anyiza na anyunuti tsüwa wi ben, nu tsü yasa meyacha; ma atsathang meyi tsü kiqa cüle ghoden.

⁶ Mizzatentithu na qhethiketen sa, kadiyyithu zankulidha; Anyiza na maghachi nu ayyi na tssüghe.

⁷ Kekhang ntsawa Apvüwa na ithu ssiden; Jacob Nyiza tsüna ithu ken-nie penwa.

⁸ Gho Apvüwa na mangwa kulitheng khe ghangchilo. Ma ayyi wi amankesa khati kulitheng khe ghangchilo.

⁹ Ma ayyi tsüdi wi aghikesa khen; ma alamugho pashü, apiethu yasa, nu anni pi atsonhithu la mecang.

¹⁰ “Aghi nsa layi,” ma isakhi, “Nu hi Anyiza le kesa chü yalo, mizzatentithu miwi kedi ntsawa, ayyi wi kemisi ntsawa.”

¹¹ Kekhang ntsawa Apvüwa na ithu ssiden; Jacob Nyiza tsüna ithu ken-nie penwa.