ZAKECI 45 - Kemethajüh (N) (Re-editing) Bible (BSI)

Kadimi keshanyi khwi

¹ Hi kadimiwa ghena akhwi ha cü keben wi, ajüh kemehai kejon na hi kemeshen pongya. Anyi pala zhükemehaiwa kezhüchan tsüti imili na azakeci kiden yadha.

² No npvüzathu tsüdi miwi atsikemehai ntsawa; no ajüh khi kemehai ntsawa. Anyiza matsü tsüdi wi sawegü pi no cü.

³ No njünnu pi khangyalo, kekhang kadimiwa; no anyanthang nu ajenben.

⁴ Atsentsa nu kemeshon sheikepi ghena anyankethang wina khangkeya ajenkeben miwi kiyalo! No kezüwa tsüna khangkeya kedi kejon sengho no cüden!

⁵ Nlakusü na dighe ntsawa, tsüna no nankemeghüthu leben mejenqhe cüden; mizzatentithu na nccü wi qancadu.

⁶ Anyiza na kadiyyi pi no kecüwa tsüna anuphan nu anuphan wila ben den. No kemeshon sen nu n-nyithu miwi kekhang sen;

⁷ no kemeshon ghali nu nkemehai nanmeghü den. Tsalina Anyiza, n-Nyiza na no kessiyadha, nu kadimi kepathu miwi anonkeghe ji kayi pi nmiwi keshusha chidha.

⁸ Mirr nu Aloe hankedemvuthu tsüna nthsü wi ben; asayha pi kadijjen sa ketheng witsü akhwi kesathu na akhwi sapi no kina thsü.

⁹ Nccühha wi nzathu jawi tsü, kadingathu na ben, nu no kadipen ajewa witsü kadijja na ngan ben, suna jawi kemehai ntsawa pi ma tsisa pvü.

¹⁰ Kadimi wubvü, hi mangwa khiben khe kina chilo— n-nyithu nu ntheghithu malilo.

¹¹ Ntsikemehai ghena kadimiwa na no tepagha thsü ben; ma nPvüwa, tsalina no ma jüh nkinathu yishü.

¹² Tur nyithu na aju sengho no cüden; kebanthu na no kenen sayale kesa kidenden.

¹³ Kadimi ngawa na kadipen wi ben— ma khatila atsimehai nu! Ma kemechan gwomejuwa tsüna sunale pi satheng.

¹⁴ Kemechan gwomejuwa tsi kepapa kesa pi pvü thsü nu ma ssinu kadimiwa tuwi gho, nu shanyili pvüshangthu na ma sennie, nu mathu la ssinu ma tuwi gho.

¹⁵ Mathu na nong nu nonghe ghola kadimiwa jjen wi duya.

¹⁶ No hi kadimiwa, atsa kejon muyaben, nu nbamyithu kuti sa kadimi sa thsü, nu no mathu pi ayyi tsüdi wi kekhang sen thsüden.

¹⁷ Ikhwi ha n-nyankethang ya anuphan hang cüden, nu anyi tsüdila ghaketen tsü tsüdi wi no seng den.