ZAKECI 42 - Kemethajüh (N) (Re-editing) Bible (BSI)

LESÜSHEN KENI ( Zak 42—72 ) Kushinyiwa kekhie

¹ Ameshü na aghaku tssü kekicü nmvu keten tsüti, hi la no nmvuden, O Anyiza.

² Hi no nmvu benle, hangkebenwa Nyiza; hi khathansha wi wala no ketenpen wi kinyiyaten nu?

³ Ghaja ghanan hi qai, nu inyontssü pi itsse sa; matsü tsüdi wi ighinyithu na hi keü, “N-Nyiza na khie wi ben nu?”

⁴ Hi kheni cüki meshenkeya wi ileben naa, hi anyitenti gweghe Anyiza jjen wi kewa wi, nu hi anonkeghe tenti la ssinu alentsen, akhwisa nu jisha pi Anyiza seng kesa tsü!

⁵ Hi mangkesa na ihathana ntsa ben nu? Hi mangkesa na ketizensa ntsa ben nu? Hi kaghang pi Anyiza miwi chi, nu hi kheneng ma seng den, hi hangshawa nu iNyiza.

^6-7 Hi kushiyyi wi ben nu ileben güccü mtsü le, tsalina hi kemeshen khapeghe pi ma wi chi. Ma leben gükeccü hatha kesun pi ighamu miwi chi; kekivvü na atssü keti ti imiwi ghamo pi hi kitsan, Hermon Yikha nu Mizar Yikha wi achacha tssü hhai na Jordan wi dugho keben ti.

⁸ Apvüwa ya aghanan wi ma ghaliki ketenwa tsüpi ccüca kechiwa sa, isanu hi ya aghaja wi tsüpi akhwisa, hi kahang Nyizawa wi kekhie saya thsüle kesalina.

⁹ Isheikepiwa, Anyiza wi, hi khi, “No mangkesa na hi malidha nu? mangkesa na ighinyithu lebenketsu wi hi ketizensa ben nu?”

¹⁰ Mathu na hi nkekhichi jüh kekhi tsüna hi pacha ntsa sadha, “N-Nyiza na khie wi ben nu?” isa mathu hi keü.

¹¹ Hi mangkesa na ihathana ntsa ben nu? Hi mangkesa na ketizensa ntsa ben nu? Hi kaghang pi Anyiza miwi chi, nu hi kheneng ma seng den, hi hangshawa nu iNyiza!