ZAKECI 40 - Kemethajüh (N) (Re-editing) Bible (BSI)

Kesengkhwi

¹ Hi ilebensie ntsa nu Apvüwa na hi kiqa kecü hie; ma hi kiqai hhai kina cü.

² Ma kemessi yyiku wi shüya kemehai nisha wina hi zanshi cü, ma hi ya alonshi miwi ntaqhe nganya thsü, nu yazishu benya thsü.

³ Ma akhwi ketheü pi hi sansi cü, tsüna ithu Nyiza kesengkhwi. Ha mu keyathu kejon na messi, nu mathu kenondi pi Apvüwa miwi chiyaden.

⁴ Apvüwa nondi ketenthu na kemihhi ntsa, mathu na atsikezhüthu wi nwa nyelela milikemesa cenpvü kekinyithu ngweghe.

⁵ No ithu ghena pala kejon kuli chidha, O Apvüwa ithu Nyiza; ciwi thola no ti kesa nmi le! No ithu ghena amankesa acho kejon kiden pi thengdha. Hi tsüthu tsü khi wa cu meyacha— tsüthu na si meyakhi le!

⁶ No ahhansha nu kekinyiju tsü yamvu nten; no aghangsa maben pi kekinyipen wi kemecang nyelela kesamithu tsü sen bvü thsüale kesa ghena hhansha khie nten. Tsüwa nyela, nhhai zaya thsüle kesalina no akhuna pi hi cü,

⁷ tsalina hi lunengchi, “Hi hewi ben le; no hi kesansi jühthu tsüna Ayenwa lesüshen wi ben.

⁸ No kenen kesa tsüna khatila hi nen nu, iNyiza! Hi no kesansijüh tsüpi ileben wi theng den.”

⁹ Apvüwa, n-nyithu tsüdi saghu keben witsü, no ithu hangshakeya jüh kemehai tsü hi pi khichi. Hi tsüpi nkhila meyacha kesa no chüben.

¹⁰ Hi no hangshakeya jüh tsüpi ileben wi kuthi nsa; hi keshüthangla nleben tsentsa kesa, nu kekiqa tsüpi khiden. N-nyithu tsüdi saghu keben witsü hi njühkeya, nu ghaliki kesa ghena ceen ben meyacha.

¹¹ Apvüwa, no khiela hi ntizenla sa nben kesa hi chüben. No kaghali nu ajühkeyali tsüna keshüthangla hi noncca ben den.

Kekiqa kekhie

¹² Agükeccü si nkeyakhi na hi vüben! Hi kesamithu na hi shanbhon ben, nu hi mangla nmu ladha; tsüthu tsüna ilissen miwi la ji, nu hi kempvüza nmiladha.

¹³ Hi hangsha yalo, Apvüwa! Khili hi kiqa cülo!

¹⁴ Hi pathiale kiden ketenthu yala nyu nchatha mathu kivvü thsü kesawa sa! Igükeccüthu ghena mathu nonghe ketenthu yala mathu senkheneng, nu kejügheya keyawa sa!

¹⁵ Hi nankeqhe ketenthu na nyu nchala kesalina mathu hathana thsü kesawa sa!

¹⁶ No wi keghothu tsüdila nong, nu nonghe keyawa sa. No hangshakeya ghena no seng ketenthu tsü, atsathang wila, “Apvüwa na khatila di nu” isa khi ketenwa sa!

¹⁷ Hi keyha nu hhatudha, O Apvüwa, no hi mali nten. No hi hangshawa nu iNyiza— kaghaji nu hi kiqa cülo!