ZAKECI 38 - Kemethajüh (N) (Re-editing) Bible (BSI)

Anyi Ketizensa kebenwa kekhie

¹ O Apvüwa, nleben keminu wi hi meten-mesha nsalalo!

² No nlakusü pi hi mesa-menadha; no hi kihheshüdha.

³ Nleben ketsu ghena hi naa ntsa saben; hi kesami ghena igwo maben sanaa wadha.

⁴ Hi kesami wi meyanthi ben; tsüthu tsüna nkepvücha khhi kekiyan kesü sadha.

⁵ Hi kejüphon ghena, hi kinaa yisüthu na bighe pi hansa wadha.

⁶ Hi whenghe pi naa wadha; hi ghanan thangthangla anongüthi ben den.

⁷ Kemuwhe na hi mecang nu hi keshü tetsaki bendha.

⁸ Hi pacha pi ncha ladha; ileben güccü nu hi kinaa wina ghadhi.

⁹ O Apvüwa, hi mangwa nmvuben khe no chüle; no hi kaghadhi tsüdila zaben.

¹⁰ Ileben na thonthon sa, nu hi kezü nmidha, nu inyon kemizi nmiladha.

¹¹ Ipvüshang nu ijenphonthu na hi kekhumathu ghena ikete wi ngho ladha; itheghi la hi ghü wadha.

¹² Hi pathi mvu ketenthu na ighena aca pi lla, nu hi patena mvu ketenthu na hi yasa cüle pateqhe; mathu na nhandhila hi matang.

¹³ Hi akhuna kedecu nyi ti nza ladha, nu hi kejeng ti ajüh la khi meya ladha.

¹⁴ Hi anyi kesü na ma nkiza ghena nyu lunengya nketen ti sadha.

¹⁵ O Apvüwa; isala hi no nondi ten le, O Apvüwa iNyiza, no hi lunengchi metsi.

¹⁶ Ighinyithu yala ihathakina nankeqhe nsa thsüla; hi keqanca ghena mathu nkapvü thsü lalo!

¹⁷ Hi kekhuli pang sadha, nu hi kinaa na nhandhi ladha.

¹⁸ Hi hi kesamithu khishichi; tsüthu na hi pong pi leben hagidha.

¹⁹ Ighinyithu na agwo mehai nu zü; ma jjügi nkemi wi hi nankemeghü nyi kejonla ben.

²⁰ Nkemehai pi kemehai ton ketenthu na hi kemeshonwa kesa tsü hi shun.

²¹ O Apvüwa iNyiza, hi nteshi lalo; temeja wi ben wa nsa lalo!

²² Khili hi kiqa cülo, O Apvüwa hi hangshawa!