ZAKECI 36 - Kemethajüh (N) (Re-editing) Bible (BSI)

Anyi na Nkemehai

¹ Kesami tsüna nketsatan leben non wi ma ccüneng ben den; ma Anyiza meya mvu nu ma nyuwakü nten.

² Ma ketanla ma dithang ben keten ghena, Anyiza na ma kesami mu nu ma meshensa nbenle kesa meshen den.

³ Ma jüh kekhi tsüna nkemehai, nu milikemesa na pong ben; ma kemetsa nu kemehai kekulithu tsü nsa ladha.

⁴ Ma ma we wi khhali nu nkemehai kekulithu meshen ben den; ma kekuli kesütanla kemehai nmi, nu ma nkemehai kesütanla meya mvu sa nten.

Anyiza Kemehai

⁵ Apvüwa, no ghaliki keten tsüna atssan la cu bendha; nleben tsentsa tsüna atssanthu la cu bendha.

⁶ No ketsatanwa tsüna ayikha ti kaghashun bendha; no wi atsentsa tsüna atssükedone kedhu ti kesale. No anyi nu aghangsathu noncca den.

⁷ O Anyiza, no ghaliki ketenwa tsüna khatila ma men dhu nu! Ithu na ngisha kekhu wi n-nieyaden.

⁸ No kemeshukemena tsse khukechi tsüpi ithu mishuden; no ithu yala no kemehai ghaku wi tsü jjüya thsü.

⁹ No kahangli tsüdi bvüwa le, nu no kewegü ghena ithu ya kewegü muya thsü.

¹⁰ No chü nu hang ketenthu ghaliki tenlo, nu kemehai kuli pi ketsatan miwi chilo.

¹¹ Kekapvü nyithu yala hi nmatang thsüla nyelela nketsatan yala hi jügüpi nsa thsüla.

¹² Nkemehai nyithu kekuli pen tsü ghangchilo. Mathu na shagha meyala ciwi khuliben.