ZAKECI 34 - Kemethajüh (N) (Re-editing) Bible (BSI)

Anyiza Kemehai Keseng

¹ Hi keshüthangla Apvüwa seng; hi ma nseng la meyacha.

² Hi ma kuli kechi tsü ghena ma seng den; nyu ma nkhichi ketenthu ya kina ya, nu anonghe keyawa sa.

³ Hi gweghe nu Apvüwa kedi pi thangchi; ithu gweghe ma nyan seng nalo.

⁴ Hi Apvüwa wi khie, nu ma hi luneng chi; hi kemessi tsüdi wina ma hi lisha cü.

⁵ Ma shun ketenthu na ma ghang nu anonghe ya; mathu ya khiela accükwenshü thsü nsa.

⁶ Kekiqa nkemithu na ma cichi, nu ma luneng chi; mathu gükeccü wi ma mathu hangsha cü.

⁷ Ma nyilo na Apvüwamessikü ketenthu ghihieden, nu kemessi wina mathu hangsha cüden.

⁸ Apvüwa na khatila mehai khe no ketanla tsü bhashi yalo. ma wi ken-nie mukeyathu na kemihhi ntsa.

⁹ Apvüwa nyuwakülo, ma nyithu tsüdila; ma jühkina ketenthu na mathu nsenthu keyishü tsüdi benyadha.

¹⁰ Ssensitemithu lela ma tsse nmila kesa ghena ghama ben den, isala Apvüwa jühkina ketenthu na mangla hhatu nben.

¹¹ Ipvüshangthu, gho ijühkina lo, hi Apvüwa nyuwakülo kesa pi nthu sansi cüden.

¹² No hang nonkwenya mvuben kwe? no kesie kahang nu anonkeghe ya mvuben kwe?

¹³ Isalethu nkemehai kekhi nu milikemesa kekhi kekheneng yalo.

¹⁴ Nkemehai wi tsü kheneng nu kemehaiwa saya; nleben tsüdi pi keccawa ghena aghechen saya.

¹⁵ Apvüwa na ketsatanthu hieden, nu mathu kiqai hhai kina den.

¹⁶ Isala ma nkemehai kuli ketenthu shunden, isanu mathu na shü lethu wan mathu maliden.

¹⁷ Ketsatanthu na Apvüwa ci chithu ma kina cü; mathu gükeccü tsüdi wi ma mathu hangsha cüden.

¹⁸ Apvüwa na accükwenshü kebenthu kete wi ben den; mathu kaghang nmila kesathu hangsha cüden.

¹⁹ Anyi kemehai nyi na gükeccü kejon wi ketizensa, isala Apvüwa na tsüthu tsüdi wi ma hangsha cüden.

²⁰ Apvüwa na mehaitsü ma nonccaya; nu ma gü kesütanla npashü thsü.

²¹ Nkemehai na nketsatanwa pathi den; ketsatanwa nanmeghü ketenthu na kemeten muya den.

²² Apvüwa na ma nyithu hangsha cü; ma wi n-nieya le bha keghothu hangsha yaden.