ZAKECI 32 - Kemethajüh (N) (Re-editing) Bible (BSI)

Kesami Kekhishi nu Teshi kecü

¹ Mathu kesami teshi pi cü nu mathu kesazzi teshi pi cü kesathu na kemihhi ntsa.

² Apvüwa na mathu kesazzi ghena mathu nkemeshensathu, nu nyu kemechu wi nkebenthu kemihhi ntsa.

³ Hi kesami nkekhishi wi, atsathangla kiqai wi igüccü gho.

⁴ Ghaja ghanan no hi meten-mesha, Apvüwa; hi kezü tsüdila bvükhia, kiyeng wi atssü na ngen keten tsüti.

⁵ Tsasengwi hi kesamithu khishi pi no wi chi; hi hi kesazzithu nkuthi. Hi kesami khishi pi no wi chile cenya, nu no hi kesamithu teshi pi hi cüa.

⁶ Tsalina no ssinu ashusa keten nyi tsüdila nsenthu keyishü tsü wi no wi nkhiethu yishü; agükeccü na atssüketi ti kegho wi tsüna mathu cu meyacha.

⁷ No hi kekuthi penwa; no agükeccü wina hi hangsha cüden. Hi no hangshakeya tsüpi misikhhali akhwi saden, kepaghenanye no hi khweden.

⁸ Apvüwa na khi, “No khiewa nwathu yishü khe hi pi no sansi cüden; hi no kicükegwe nu no kizaden.

⁹ Goru nyelela Gada na ajühkina thsüle amighe pi ma pang bhen nu ssi keten tsüti njüphon lalo.”

¹⁰ Gheshighenawa na agüccü yaden, isala Apvüwa nondi ketenthu na ghaliki keten pi mathu khweden.

¹¹ Nthu ketsatanthu, Apvüwa kuli kechithu ghena nthu nonghe nu nong yalo. Ma jühkina ketenthu nthu nonkeghe ghena jishalo!