ZAKECI 30 - Kemethajüh (N) (Re-editing) Bible (BSI)

Keseng kekhie

¹ Hi no sengben, Apvüwa, kepaghenanye no hi hangsha cü, nu ighinyithu yala hi nankeqhe thsü nsa.

² Hi kiqa cülo no wi khie, O Apvüwa iNyiza, nu no hi sapi mehai cü.

³ No ashüjjen wina hi hangsha cü. Hi pala kedhu ntsa wi du keten, isala no hi kahangli khuneng chi.

⁴ Kesengkhwi pi Apvüwa sakilo, leben tsentsa wi ma nyi sa ketenthu tsüdi! nu nkesengcha pi ma nyan kemethawa wi chilo.

⁵ Ma leben ketsuwa tsüna matsü keutan, isala ma kemehai tsü kahang chu ben den. Aghaja wi anyontssü lleya mehai, isala ghanenwa wi anonkeghe na ghoden.

⁶ Hi meshen pi yazishu nu hi ketanla hi ccüneng, “Hi khiela nyu nchala sa nben.”

⁷ No ituwi mehai, Apvüwa; no ayikha khweti ti hi khweden. isala no hi kuthi bvü kesa wi hi messi wa.

⁸ Hi no cichi, Apvüwa; hi no wi kekiqa keshükene:

⁹ “Hi keshü ghena no mangwa kiyiya ben nu? Hi ashüjjen wi wathu kekiyi mangwa ben nu? Keshü nyithu na no sengya mehai kwe? Mathu na no kemehai tsüpi thangchiya mehai kwe?

¹⁰ Ihhai kina cülo, Apvüwa, nu hi nantizen cülo! Hi kiqa cülo, Apvüwa.”

¹¹ No ihathakina sa kemili pi inonghela nashü thsü; no ihathakina sen bvü nu anonkeghe pi hi vüshakhi cü.

¹² Tsalina hi ceen ben meyacha; hi kesengkhwi sapi no wi chiden. Apvüwa, no iNyiza le, hi anuphanla nkesengcha sapi no cüden.