ZAKECI 27 - Kemethajüh (N) (Re-editing) Bible (BSI)

Keseng kekhie

¹ Apvüwa na hi kewegüwa nu hi hangshawa; hi thola messi meyacha. Apvüwa na kemessi tsüdi wi ighihie den; hi messi meyacha.

² Anyi nkemehaithu na hi matang, nu hi pathiale kiden lela, mathu ccü meshü nu khuli den.

³ Süpahi maben na gho hi vüya lela, hi messi meyacha; ighinyithu na hi matang lela, cila hi Anyiza nondi den.

⁴ Hi Apvüwa wi pala kesü khi; hi pala kesütan yamvu ben: hi kahang chu Apvüwa jjen wi hang, ciwi ma kemehai tsü ghang pi imansa nu ma lenketsütson tsü khie.

⁵ Agükeccü tsüwi ma ikekhwen sa; ma Kekinyijjen wi tsü hi ya nmessila benya thsü, nu hi ya alonshi kemisi wi yazishu benya thsü den.

⁶ Isanu ighinyithu na hi vü sen keben miwi khang yaden. Hi inonkeghe wi jisha nu ma Kekinyijjen wi ahhansha sa chiden; hi akhwi sapi Apvüwa saki den.

⁷ Apvüwa, hi no ci kechi wi ihhai kina chi cülo! Hi nantizen nu hi lunengchi cülo!

⁸ No khi, “Gho nu hi kinyilo,” Hi luneng, “Hi ghoden, Apvüwa;

⁹ No hi nkuthi lalo!” Imiwi nleben ntsu la; nmaghawa kesun pi nbvü thsü lalo. No hi kiqa gho; hi nteshila, hi teshi nsa lalo, O Anyiza, hi hangshawa.

¹⁰ Ibajja na hi teshi ya mehai, isala Apvüwa na hi noncca yaden.

¹¹ Apvüwa, hi ya mangwa sa thsü mvu ben khe pi hi sansi cülo, nu hi ssinu kemessi nkemi len witsü walo, kepaghenanye ighinyithu na kejon ben.

¹² Hi teshi pi ighinyithu kwen wi chi nsala, milimesa nu patekitsan wi hi matang ketenthu tsü.

¹³ Hi khili kahang wi ha hangben nu Apvüwa kemehai tsü mu nengya ben kesa hi chüben.

¹⁴ Apvüwa nondi benlo. Kenondi benya, accükwen nshüla. Apvüwa nondi benlo.