ZAKECI 25 - Kemethajüh (N) (Re-editing) Bible (BSI)

Alen Ketsütson nu Aghikehie ghena kekhie

¹ O Apvüwa, hi kekhie sapi no wi chi ben;

² iNyiza, hi no nondi tenle. nyu nkecha kejüghe wi tsü hi hangsha cülo; ighinyithu yala imiwi mathu nonghe nsa thsü lalo.

³ Khang nkeya na no nondi ketenthu miwi gho nten, isala wan no shun ketenthu miwi wa thsülo.

⁴ Nlenthu tsüpi hi sansi cülo, O Apvüwa; tsü pi hi chü thsülo.

⁵ Hi sansi pi no ketsatan nie nu hangya thsülo, kepaghenanye no hi hangsha kecüwa, iNyiza. Hi keshüthangla na nondi den.

⁶ Meshenchilo, O Apvüwa, no kheni wina pi ccüca kechi keccaketssü, nu ghaliki ketenwa tsü.

⁷ Hi kepvünyi tsüwi kesami, nu kesazzithu tsü teshi pi hi cülo. No ghaliki keten nu kemehai wina hi meshenchilo, Apvüwa!

⁸ Kepaghenanye Apvüwa na tsatan nu mehai, ma n-niethu keyishü len pi kesamithu sansi cüden.

⁹ Ma satemeni ketenthu ssinu kemeshon len wi wa nu ma leben kemeshen pi mathu sansi cüden.

¹⁰ Ma leben tsentsa nu kaghali, sen nu ma cenkethenjüh, nu ma jühkhukechi nie ketenthu tsüdi len tsütson.

¹¹ Apvüwa, no khishikechi ti, hi kesami teshi cülo, kepaghenanye tsüthu tsüna ji ntsawa.

¹² Apvüwa nyuwakü ketenthu na mathu n-niethu keyishü lenwa tsü chüya den.

¹³ Mathu na keshüthangla mehai kayi, nu mathu tsangathu na ayyiwa tsü yaya den.

¹⁴ Apvüwa na ma jühkina ketenthu pvüshangwa, nu ma mathu ssinu cenkethenjüh tsü satezü den.

¹⁵ Hi matsü tsüdi wi Apvüwa kekiqa ghang, nu ma kemessi wina hi hangsha cü den.

¹⁶ Hi wi khapeghe gholo, Apvüwa, nu hi nantizen cülo, kepaghenanye hi hi ketan nu nkhangle.

¹⁷ Ileben gükeccüthu wina hi satecca cülo, nu igükeccüthu tsüdi wina hi hangsha cülo.

¹⁸ Ileben gükeccü nu ketizenkesa meshenchi, nu hi kesamithu tsüdi teshi cülo.

¹⁹ Ighinyithu khaju ben khe ghangchilo; mathu na khatila hi nanmeghü ben khe ghangchilo.

²⁰ Hi khwe cü nu hi hangsha yalo; hi pi nyu nkecha wi nchila. Hi hangshaya le no wi gho ben.

²¹ Hi kemehai nu hi ketsatan ghena hi noncca kecüwa sa, kepaghenanye hi no nondiden.

²² O Anyiza, mathu gükeccü tsüdi wi, n-nyi Israel hangsha cülo!