ZAKECI 24 - Kemethajüh (N) (Re-editing) Bible (BSI)

Kadimithu Kadimiwa

¹ Ayyi nu ayyi wi keben tsüdila Apvüwa ji; anyi nu ciwi hang kebenthu tsüdila ma ji.

² Ma atssü kedhu miwi na ayyi sachi, nu atssükedone kedhu wina tsü kitegüchi.

³ Thowa na Apvüwa yyishiphon wi tsü keki qo nyi ben nu? Thowa na ma Kekinyijjen wi tsü duya mehai nu?

⁴ Kekuli nu kemeshen kemethathu, atsikezhü kinyi nketenthu nyelela milikemesa jüh khi nketenthu le.

⁵ Apvüwa na mathu sawegü cü nu hangsha cüden; mathu kesazzi nmile kesa Anyiza na khishi chiden.

⁶ Hathu hana anyi Anyiza wi gho ketenthu, mathu na Jacob Nyiza ketenpen witsü ghoden.

⁷ Ajenkathu mezaqo shachilo, kheni jenkawa tsü shachilo, isanu kadimiwa ya dugho thsülo.

⁸ Kadimiwa ha thowa nu? Ma kezü nu kekhang keben Apvüwa, ma aghi wi khangkeya Apvüwa le.

⁹ Ajenka tsü mezaqo shachilo, kheni jenkawa tsü shachilo, isanu kadimiwa ya dugho thsülo.

¹⁰ Kadimiwa ha thowa nu? Ma khangkeya kebenwa Apvüwa ma kadimithu kadimiwa le.