ZAKECI 21 - Kemethajüh (N) (Re-editing) Bible (BSI)

Khangkeya ghena Keseng

¹ Kadimiwa na ma nonghe ben, O Apvüwa, kepaghenanye no kezü pi ma cü; ma ma nonghe ben kepaghenanye no ma sa pi khangya thsü.

² No ma leben kenmvuwa pi ma cüdha; no ma kekhie yacüdha.

³ No kesawegü keti sen nu ma wi gho, nu kadimi suna liwen pi ma li wen cü.

⁴ Ma no wi kahang khie kechi wi, no kesie nu anuphan kahang pi ma cü.

⁵ No ma kiqa kecü ghena ma nyankethang di ntsa sadha; no anyankemechan nu ajenkeben pi ma cüdha.

⁶ No kesawegü na anuphanla ma ssiden; nu no keten tsüna anonkeghe pi ma pong cü.

⁷ Kadimiwa na kekhang ntsawa Apvüwa nondiden; Apvüwa ghaliki keten ghena ma keshüthangla yasishu benya den.

⁸ Kadimiwa na ma ghinyithu tsüdila ghanya; ma ma nanmeghü keten nyi tsüdila ghanya den.

⁹ Ma shhugho lethu anni keqhe ti mathu tsüdila yasa cüden. Apvüwa ma lebenketsu wina mathu tsüdila meji yaden, nu anni na mathu tsüdila mecang den.

¹⁰ Mathu shicü thola hangya nben; kadimiwa na mathu tsüdi pathiaben .

¹¹ Mathu na nkemehai kekuli meshen, nu ma matang, isala mathu na mangla sa nu khangya nben.

¹² Ma ma lakusü pi mathu ga, nu mathu ya khapeghe sen nu bvü thsüaben.

¹³ Apvüwa na kezü kedi ghena, ithu na no seng le! ithu akhwi sa pi no kekhang saki den.”