ZAKECI 19 - Kemethajüh (N) (Re-editing) Bible (BSI)

Anyiza na Sakechithu wi Ma Nyanthang ben

¹ Atssan wi Anyiza nyankethang pi ccücakechi ha mang khatila methamenasi nu! Ma kwen pi sakechi ha mang khatila mechan-metsa pi ccüca ben nu!

² Ghanan kaghapenla dhitsüwa ghena khichi; ghaja kaghapenla tsashiwa ghena khinengchi.

³ Ajühkhi nyelela ajühthu la nsen, ahhai mangla nza;

⁴ isala mathu ketsijüh tsüna ayyi tsüdi wila wa nu tsüna ayyi kenten tsüdila za. Anyiza na atssan wi aghani jjen sachi;

⁵ tsü yala shanyiwa nonkeghe ti aghanen shhugho, kesanghang nyi kesü na bvü wa mvu keben ti.

⁶ Tsü yala atssan katen kesü wina pvüdhi sen nu pahanwa wa, mangla ma kisa tuwi kuthi meya.

Apvüwa Yen

⁷ Apvüwa yenwa tsüna mehai cencu; tsüna kezü ketheü khuchi den. Apvüwa jühkhukechithu tsüna nondi qo, pi kemetsa zeng kebenthu cü den.

⁸ Apvüwa yenthu tsüna meshon, nu tsü nie ketenthu na nonghe yaden. Apvüwa jühkhukechithu tsüna atsentsa, nu chüya kemehai kemeshen khuchi den.

⁹ Apvüwa nyuwakü keten tsüna mehai; tsüna anuphanla ben den. Apvüwa jühkekaghakhithu tsüna atsentsa; tsüthu na keshüthangla meshon.

¹⁰ Suna kemehai ntsathu miwi la tsüthuwa yamvu; tsüthu na anikholi miwi minnun.

¹¹ Tsüthu na palakechü pi nmaghawa, hi cüden; hi tsüthu kenie ghena akutimen muya den.

¹² Anyi thola ma ketanla ma kesazzi mu nten; Apvüwa, hi zanshi cülo, kekuthi kesazzi wina!

¹³ Aghandu kesami wi tsü la hi hangsha cülo; tsüthu yala imiwi nkhang thsüla. Isathu hi mehai cencu nu kesami wi bvü yaden.

¹⁴ Ijüh nu hi kemeshenthu ya ntuwi keya qo saya thsülo, O Apvüwa, hi ken-niepenwa, nu hi hangshawa!