ZAKECI 147 - Kemethajüh (N) (Re-editing) Bible (BSI)

Kekhang ntsawa Anyiza Keseng

¹ Apvüwa seng! Kesengkhwi pi ithu Nyiza kesaki tsüna mehai le; ma keseng tsüna mehai nu meshon le.

² Apvüwa na Jerusalem tsü sapfüneng; ma jügüshi kesathu tsü kheneng ssigho.

³ Ma aleben kinaa sapi cca cü, nu mathu kekhuma tsü qhan cü.

⁴ Ghotsithu khaju pi theng ten khe cenyadha, nu kesüsü na ma nyan chiya.

⁵ Ithu Pvüwa tsüna di nu khang ntsa; ma kemetsa na kedegü meya.

⁶ Ma ma satemeni ketenthu zanki cü, isala gheshighenathu tsü pacha pi ayyi wi chi.

⁷ Keseng khwithu sapi Apvüwa wi chilo. Harp pi akhwi khou pi ithu Nyiza wi chilo.

⁸ Ma akulu pi atssan wi chi; ma ayyi ghena atsankegho khuchi, nu aghang pi ayyishiphon thu tsüdi wi shigü thsü.

⁹ Ma atsse pi aghangsathu nu aduweng zzathu na khou kechi wi mathu ghanja cüden.

¹⁰ Ma nonkeghe tsüna goru kezü nyelela ma kenen tsüna süpahi kempvüzathu miwi nmi;

¹¹ isala ma nyuwakü ketenthu miwi tsü ma nonghe den, thothu na ma ghaliki keten tsü nondi ten khe.

¹² Apvüwa senglo, O Jerusalem! Anyiza senglo, O Zion!

¹³ Ma no kaghapeng jenka yala zükeqhe benya thsü; ma n-nyithu sawegü cü.

¹⁴ Ma nggü tsüpi apvü-nkesa wi theng cüden, nu awhengsu kemehai ntsawa tsüpi n-nonkwenya thsüden.

¹⁵ Ma ajühkhukechi pi ayyi cü, nu ma wan nu mangwa khi theng khe tsü saden.

¹⁶ Ma aghola pi asükhothsü ti shighe, nu akejantssü pi ayyinikhu ti vvüghe chi.

¹⁷ Ma alonketizü ti aghayi kesunchi; ma kesunkechi kekicü wi tsü thola kethankehiya nben!

¹⁸ Isanu ma ajühkhuchi, nu aghola na tssüghe; ma ameghü kesunchi, nu atssü na lle wa.

¹⁹ Ma ajüh pi ma nyithu cü, ma kicükegwe, nu ayenthu pi Israel cü.

²⁰ Ma anyi kepathu miwi tsü hati kuli nchi; mathu na ma yenthu tsü nchü. Apvüwa senglo!