ZAKECI 141 - Kemethajüh (N) (Re-editing) Bible (BSI)

Minulen Wi kekhie

¹ Hi no ciben, Apvüwa; khili hi kiqa cülo! Hi no ci kechi wi kina chilo.

² Hankedemvu ti hi kekhie ya cü, ikwen zanki kechi tsü pi minulen wi hhanshakesa ti ya cülo.

³ Apvüwa, ikhemeggü jenka hie yalo, aghikehie pi ipang wi chi cülo.

⁴ Kepazzi kuli mvu nu anyi nkemehaithu gheshighena witsü hi zan neng cülo. Hi ya khiela mathu kemishu wi tsü nsaghu thsüla.

⁵ Anyi kemehaiwa na keccaketssü wina hi meten nu sateküya mehai, isala hi khiela anyi nkemehaithu wina kenyuwakü tsü ya meyacha, kepaghenanye hi keshüthangla mathu nkemehai kekulithu tsü keshun ghena kekhie sa ben den.

⁶ Mathu miwi kekhang kesenthu pi alonshi kelakhieli wi khala kechi wi, anyithu na ijühthu tsüna atsentsa le kesa khiden.

⁷ Achan nankhi nu mezükhighe kesa tsüti, mathu güthu tsüna ashüjjen pang wi vvüghe ben.

⁸ Isala hi no nondi kiben, Kekhang ntsa iPvüwa. Hi no wi kekhwe bhaden; hi ya shü thsü nsala!

⁹ Mathu na acathu pi hi die ketheng witsü no hi khweyalo, nkemehai kuli ketenthu na ali pi die ketheng wina hi khweyalo.

¹⁰ Gheshighenathu yala mathu ca witsü du thsü, isala hi tsü mesa-mena nsala bvü thsülo.