ZAKECI 140 - Kemethajüh (N) (Re-editing) Bible (BSI)

Kekhwe ghena Kekhie

¹ Apvüwa, anyi nkemehaithu wina hi hangsha cü; keyasa nyithu wina hi pi keyazi wi chi cülo.

² Mathu na keshüthangla nkemehai kiden ben den, keshüthangla kekitaghathu tsü hassi chi cüden.

³ Mathu mili na nyu mcüthi keten amaghangthu ti; mathu jühthu na kobra ji ti kesa.

⁴ Apvüwa, anyi gheshighenawa wina hi khweya; keyasa nyi na hi ya khuli thsüale kesa acho kiden ketenthu wina hi hangsha yalo.

⁵ Kekapvü nyithu na aca pi hi die; mathu alie pi die nu hi ghanya le alen chuli aca sa.

⁶ Hi Apvüwa wi khi, “No iNyiza.” Hi kekiqa ghena kekhie ha kina cülo, Apvüwa!

⁷ Apvüwa kekhang ntsawa, isheikepi kezü ntsawa, no aghi wila hi khwe cüdha.

⁸ Apvüwa, gheshighenathu keya mvu tsüpi mathu ncüla; mathu cho tsü ya mehai meya thsüla.

⁹ Ighinyithu ya imiwi khang meya thsüla; hi pateqhe keten tsü sapi mathu miwi qancadu neng thsülo.

¹⁰ Amihi kenmie kisa ya mathu miwi qancadu thsü kesawa sa; mathu pi ayyiku wi khalachi, nu khiela shhugho nkeyawa sa.

¹¹ Milikemesa wina nyu metsi-meni ketenthu ya mehai nkeya thsüwa sa; nkemehai yala keyasa nyithu ghanya, nu yasa kesawa sa.

¹² Apvüwa, no ketha-u nu kehhatuthu kemeshon sheipiden kesa hi chüben.

¹³ Ketsatanthu na ntsakhiwa no seng metsi; mathu na no ketenpen wi hangden.