ZAKECI 138 - Kemethajüh (N) (Re-editing) Bible (BSI)

Nkesengcha Kesakhwi

¹ Apvüwa, hi ileben tsüdi pi no sengle; acenpvü kepathu tuwi hi akhwi sapi no seng.

² Hi no kemetha Kekinyijjen wiwa peghe nu kukedu nu n-nyan seng, no ghaliki keten nu nlebentsentsa ghena, kepaghenanye n-nyan no njüh khukechithu tsüna kemisi ntsawa le kesa no pi ccüca chidha.

³ Hi no cikechi wi no hi luneng chi; no kezü pi hi satezü cü.

⁴ Apvüwa, ayyi wi kadimithu tsüdi no sengden, kepaghenanye mathu na njüh khishikechithu tsü zayadha.

⁵ Mathu n-nyankethang keti, nu no mangwa sachi khe tsü sakiden.

⁶ No misi ntsawa wi ben lela, ken-nithu noncca den, nu kekapvüthu na no wi kuthi meyacha.

⁷ Agükeccüthu na hi vükeya wi no hi pi keyazi wi chicü. No ighinyithu leben keminu tsü matang, nu no kekhang wina hi hangshaya.

⁸ No njüh khishi ketheng tsüdi kuliden; Apvüwa, no kaghali na anuphan ben den. No sa keshhu kekuli tsü sacen chilo.