ZAKECI 137 - Kemethajüh (N) (Re-editing) Bible (BSI)

Israel nyithu na Kushiyyi wi Anonke-ü

¹ Ithu Babilon ghakuthu kete wi donki; nu ithu Zion meshen keya wi ciwi ithu na qai.

² Ithu harp pi ithu kete willow ton wi hagia.

³ Nyu ithu ghanya kesathu na akhwi salo ithu kiza; mathu satenong chilo ithu kiza: “Zion kesaki khwi kesü sapi ithu kina thsülo.”

⁴ Khatinu ithu na asang yyi wi Apvüwa kesengkhwi saya mehai nu?

⁵ Jerusalem, hi no mali lethu hi ya khiela harp tsü nkhou nengla kesawa salo!

⁶ Keushala hi no meshen meyala, nu no pi inonkeghe keti ntsawa le kesa nmeshenla lethu, hi yala khiela akhwi tsü nsa nengla kesawa salo!

⁷ Apvüwa, Jerusalem nkakeya ghanan wi Edom nyithu na mangwa kulichi khe meshen yalo. Mathu hati khiki keben tsü meshen yalo, “Tsü mezüqhe pi ayyi wi chilo!”

⁸ Babilon, no yasa tendha. No ithu ghena kulikechi tsüpi no cü neng keten anyiwa tsüna kemihhi ntsa—

⁹ n-nga memethu ghan sen wa alonshi wi kihhethi kesathu tsü.