ZAKECI 132 - Kemethajüh (N) (Re-editing) Bible (BSI)

Kekinyijjen Kesaki

¹ Apvüwa, David na ma gükeccü tsüdi wi kethansi-kethansa kesa tsü nmali lalo.

² Apvüwa, ma jüh khishikechi, no wi kekishen sa ketheng tsü meshen chilo, Jakob Nyiza Kekhangwa:

³ “Hi ijjen wi nyelela iwe wi wa nten;

⁴ hi mnan nyelela jen nten,

⁵ hi Apvüwa ghena apen kesü, nu Jakob Nyiza Kekhangwa ghena ajjen kesü npi khukechi chu.”

⁶ Bethlehem wi Cenkethenjüh Khitson cüki zaya, nu ithu na Jearim lli wi wa tsü muya.

⁷ Ithu na khi, “Ithu na Apvüwa jjen wi wa na; ma kadipen tuwi kinyi nalo.”

⁸ No kekhang mechantsi, Cenkethenjüh Khitsonwa tsü sen nu Kekinyijjen wi gholo, Apvüwa, nu anuphanla hewi ben walo.

⁹ No keqhaikedithu ya keshüthangla kemeshonwa kuli ketenwa sa; N-nyithu ya anonkeghe wi jisha keyawa sa!

¹⁰ No nmaghawa David wi njüh khishichi; no kessi kechi kadimiwa meya mvula nsala, Apvüwa .

¹¹ No atsentsa jühkhishi pi David tuwi chi—— no khunengya nketen jühkhishi kechiwa tsü: “Hi ntsathu jawi meshu kesü pi kadimiwa sa thsü den, nu ma nsengwi kekhang senden.

¹² Keujüla ntsathu na hi cenkethenjüh, nu ijühkhukechi pi mathu kecü wi tsü atsentsa sen lethu, mathu tsathu la matsü tsüdila nsengwi kadimi saaden.”

¹³ Apvüwa na Zion kessiyadha; ma tsüpi ma jjen sa mvuben:

¹⁴ “Hawa ha hi anuphan hang keten penwa tsü; hawi ha hi kekhang sen mvuben.

¹⁵ Hi ma nsenthu keyishü tsüdi pi Zion cüden. Hi kedsakejjü pi ma wi ketha-uthu nonkekwen saya thsüden.

¹⁶ Hi ma keqhaikedithu kekuli tsüdi sawegü cüden, nu ma nyithu na anonkeghe sala akhwisa nu jishaden.

¹⁷ Hawi ha hi David shicü kesü pi kekhang kadimiwa sa thsü den; hawi ha hi kessikeya kadimiwa kekhang kesen tsü noncca cüden.

¹⁸ Hi kejüghekeya pi ma ghinyithu mejubhon cüden, isala ma kadiyyi tsü mehai kayi sen nu shigü thsüden na.”