ZAKECI 119 - Kemethajüh (N) (Re-editing) Bible (BSI)

Apvüwa na Ayen Khukechithu

¹ Anyi ma kahang wi kepazzi nkemithu, nu Apvüwa na ayenkhukechithu wi hang ketenthu na kemihhi ntsa.

² Ma jühkhukechithu nie ketenthu, nu leben tsüdi pi tsüthu nie ketenthu na kemihhi ntsa.

³ Mathu na khiela kulizzi nten; mathu na Apvüwa lenthu tsü tonten.

⁴ Apvüwa, no ayenkhukechithu tsüpi ithu cü, nu ithu leben tsentsa sa nu tsü nielo ithu kiza chi.

⁵ Hi khatinu ileben tsentsa sa nu no kicükegwe kechi tsü nieya ben nu kesa tsü ghang!

⁶ Keujüla hi no ajühkhukechithu kina lethu, hi kejüghekeya tsü mu meya.

⁷ No ketsatan wi ajühkekaghaten tsü hi chükeya wi, hi aleben kemetha wina no seng den.

⁸ Hi n-yenkhukechithu tsü nie den; khiela hi nteshi lalo!

Apvüwa Ayen khukechi tsü Kenie

⁹ Khatinu anyi kepvünyiwa na ma kahang metha benya mehai nu? Njühkhukechithu kenie wina.

¹⁰ Hi ileben tsüdi sen nu no kekuli sale kesa kiden ben; hi ya njüh khukechithu tsü n-nie nsa thsü lalo.

¹¹ Hi ntuwi nsamile kesalina, hi njühkhukechithu tsüpi ileben wi chi pvüden.

¹² Hi no sengle, O Apvüwa; nlen tsüpi hi sansi cülo.

¹³ No ayen pi hi kecüthu tsü hi pi misikhhali nu khineng-khija chiden.

¹⁴ Keben-keyeng kejon pi iji sakeya miwi njühkhukechithu keniewa hi nen.

¹⁵ Hi no kicükegwe kechithu tsü ccügwencüka si; hi no kesansi jühthu tsü ketsükepha chi.

¹⁶ N-yenthu wi tsü hi kenen muyaden; njühkhukechithu tsü hi mali nben.

Apvüwa Yen Wi Anonkeghe

¹⁷ Hi nmaghawa, ituwi mehai tenlo, isathu hi hang nu no kesansi jühthu tsü nieya mehai.

¹⁸ Hi yala n-yen wi atsentsa mankesathu tsü muya thsüle kesalina inyon sha chilo.

¹⁹ Hi ayyi hawi keben matsü keu ketanle; njühkhukechithu tsüpi hi nkuthi lalo.

²⁰ N-yen kenmvu ghena ileben-naa ben le; matsü tsüdi wi hi njühkekaghakhithu tsü chüya mvu.

²¹ No kekapvüthu tsü satekü den; njühkhukechi nkeniethu na kishen-keshi muyaden.

²² Nyu nkekhichi nu nkenyuwathu wina hi lisha cülo, kepaghenanye hi n-yenthu tsü nie den.

²³ Kekhangkesenthu na saghu nu hi shun; isala hi no kesansi jühthu tsü ccügwencüka siden.

²⁴ No kicükegwe kechi jüh tsüna hi kenenwa le; tsüthu tsüna hi kesansithu.

Apvüwa yen tsü niele Kemeshenkezü

²⁵ Hi khang meyala ayyinikhu wi lla wadha; njüh khishi ketheng tsüti hi sapi hang neng cülo.

²⁶ Hi kulikechi tsüdila hi khishichi, nu no hi luneng chi; nlenthu tsüpi hi sansi cülo.

²⁷ N-yenthu tsü meshenshi yathsüle kesalina hi kiqa cülo, isathu hi no amankesa kesansi jühthu tsü meshendhu chiden.

²⁸ Ahathakina imiwi khangya bendha; no njüh khishi ketheng tsüti hi satezü cülo.

²⁹ Hi yala kepazzi len wi nwa thsü lalo, nu no kemehai wina n-yen tsüpi hi sansi cülo.

³⁰ Hi ajühkeyawa tsü kessiyadha; njühkekaghakhi wi tsü hi ileben chi.

³¹ Hi no kicükegwe kechithu tsü nieyadha, Apvüwa; hi pi kejüghekeya wi nchi lalo.

³² Hi ileben chi ntsa nu njühkhukechithu tsü nie den; kepaghenanye no meshenshikeya tsüpi hi cüden.

Meshenshikeya ghena Kekhie

³³ N-yenkhukechithu jjügi tsüpi hi sansi cülo, Apvüwa, isathu hi matsü tsüdi wi tsüthu tsü nie den.

³⁴ N-yenkhukechi tsü khi mechan-metsa pi hi kizalo, isathu hi tsü nie den; ileben tsüdi sen nu tsü nie den.

³⁵ Hi ya njühkhukechithu kenie wi benya thsülo, kepaghenanye tsüthu wi hi inonkeghe muyaden.

³⁶ Benyale kesawa nyela n-yenkhukechithu tsü nie mvuthi kesawa tsüpi hi cülo.

³⁷ Ma men nkemithu wi tsü ileben kechi zan neng cülo; ituwi mehai tenlo, no njüh khishi ketheng tsüti.

³⁸ No nmaghawa tuwi nu njüh nie ketenthu tuwi njüh khishi ketheng tsüti nie chilo.

³⁹ Nyu kekimenni kemessi wi tsü hi hangsha cülo; njühkekaghakhithu tsüna khatila amansa nu!

⁴⁰ Hi njühkhukechithu tsü nie mvule; kahang ketheü pi hi cülo, no tsatan kesalina.

Apvüwa Yen Kenondi

⁴¹ No mangkhacu hi ghali khe pi hi ccücalo, Apvüwa, nu njüh khishi ketheng ti hi hangsha cülo.

⁴² Isathu hi kimenni ketenthu tsü luneng yaden, kepaghenanye hi njüh nondi den.

⁴³ Matsü tsüdi wi hi ya atsentsa tsü khiya thsülo, hi kaghang tsüna njühkaghakhithu miwi ben.

⁴⁴ Hi keshüthangla n-yen tsü nie den, anuphan nu anuphan wila.

⁴⁵ Hi kekhenkeghe nmitha kesa wi hang den, kepaghenanye hi no kesansi jühthu tsü niele kiden ben.

⁴⁶ Hi njühkhukechithu tsü pi kadimithu tuwi khi chiden, nu tsüna hi jüghe meya.

⁴⁷ Njühkhukechithu tsü kenie wi hi kenen muyaden, kepaghenanye hi tsüthu tsü ghali den.

⁴⁸ Hi njühkhukechithu tsü kinyikü nu ghali den; hi no kicükegwe kechithu tsü meshendhu chiden.

Apvüwa Yen Wi Kenondikeben

⁴⁹ Nmaghawa, ituwi njüh khishi ketheng tsü meshen tenlo; tsüna kenondi keghang pi hi cüden.

⁵⁰ Ketizenkesa wi lela nonkwen yaden, kepaghenanye njüh khishi ketheng tsüna kahang pi hi cüden.

⁵¹ Anyi kekapvüthu na keshüthangla hi n-nyuwatha saden, isala hi n-yen tsü teshi nu bvü nten.

⁵² Kheni wi njühkekaghakhithu tsü hi meshenya, nu tsüthu tsüna anonkekwen sengho hi cü, O Apvüwa .

⁵³ Gheshighena nyi na n-yen tsü pakhhi keben mukeya wi, hi ileben tsu chaya.

⁵⁴ Hi ayyi wi matsü keu kahang jüh wi hi n-yenkhukechi tsü pi akhwithu cü.

⁵⁵ Aghaja wi hi no meshen, nu n-yen tsü meshen ben den, Apvüwa .

⁵⁶ Njühkhukechithu kenie wina inonkeghe tsü muyaden.

Apvüwa yen wi Lebenkhuchitha sa kesa

⁵⁷ No hi nmvu keten tsüdi le, O Apvüwa; hi n-yenthu tsü nie le ijüh khishichi.

⁵⁸ No njüh khishi ketheng tsüti hi nantizen cülo kesa ileben tsüdi pi no wi khie!

⁵⁹ Hi iyencükiwa tsü meshen nandha, nu no kicükegwe kechithu tsü nie le kesa hi ijüh khishi chidha.

⁶⁰ Nminula hi kaghaji nu njühkhukechithu tsü nie den.

⁶¹ Gheshighenathu na aca sapi hi die theng, isala hi n-yen tsü nmali.

⁶² No ketsatan wina ajühkekaghakhithu tsü ghena hi aghaja non wila shagha nu no seng den.

⁶³ Hi no kekuli sa ketenthu nu n-yen nie ketenthu tsüdi pvüshang kesü.

⁶⁴ Apvüwa, no ghaliki keten tsüna ayyi kepong sadha; n-yenkhukechithu tsüpi hi sansi cülo.

Apvüwa Yenkhukechi ma men keben

⁶⁵ No njüh khishi ketheng nieden, Apvüwa, nu no nmaghawa, ituwi mehai.

⁶⁶ Kemetsa nu palakechü pi hi cülo, kepaghenanye hi n-yenkhukechi tsü nondi den.

⁶⁷ No kemeten pi hi npi kecü wi hi pazzi bvü den, isala khilitsü hi njühkina den.

⁶⁸ No khatila mehai nu khatila ccatssü nu! N-yenkhukechithu tsüpi hi sansi cülo.

⁶⁹ Anyi kekapvüthu na imiwi milikemesa khi, isala hi ileben tsüdi sen nu no kicükegwethu tsü nie.

⁷⁰ Anyi hathu gwo wi pala meshenshikeya nmi, isala hi n-yen wi tsü hi kenen muyaden.

⁷¹ Hi kemeten tsüna ighena mehai le, kepaghenanye tsüna hi sapi n-yen khukechithu tsü chüya thsüden.

⁷² Ayyi wi apisa tsüdi miwi no n-yen pi hi kecü tsüwa ighena ma men benle.

Apvüwa yenwa Kemeshon

⁷³ No hi sachi nu hi pi keyazi wi chi cü; hi yala n-yenthu tsü chüya thsüle kesalina meshenshikeya pi hi cü.

⁷⁴ No nyuwakü ketenthu na hi mukeya wi mathu nonghe den, kepaghenanye hi njüh khishikechi nondi den.

⁷⁵ Njühkekaghatenthu tsüna tsatanle kesa hi chüben, Apvüwa, nu no ajühtsentsa sen keten ghena hi meten-mesha den.

⁷⁶ No ituwi khishichi ketheng tsüti, no ghaliki keten tsü ya nmaghawa, hi satecca cülo.

⁷⁷ Hi nantizen cülo, isathu hi hang yaden, kepaghenanye hi n-yen wi tsü inonghe den.

⁷⁸ Anyi kekapvüthu ya milikemesa wi hi metsi-meni kesa tsü ghena kejüghekeya muya thsülo; isala hi tsü no kicükegwe kechithu tsü meshendhu ben den.

⁷⁹ No nyuwakü ketenthu ya hi wi gho thsülo— n-yenkhukechithu tsü chü kebenthu tsüdila.

⁸⁰ Hi yala njühkhukechithu tsü nie cencu keyawa salo, nu nyu nkecha kejüghekeya tsü pi hi ghü cülo.

Zanshicülo Kekhie

⁸¹ Hi hangsha cülo no kehie wi hi ncha ladha, Apvüwa; hi kenondi pi njüh wi chi.

⁸² “No khathansha wi hi kiqa cüten nu?” hi isa keü, nu njüh khishi ketheng tsü hie pi inyon la naa wadha.

⁸³ Hi kedsautssü khüti nsenla kemehai tsüti sadha; isala hi njühkhukechithu tsü mali nsa.

⁸⁴ Hi cela matsü khathu hie whaten nu? No khathansha wi hi meten-mesha ketenthu tsü kemeten pi cüten nu?

⁸⁵ Anyi kekapvü, n-yen nie nketenthu na ayyiku chhü pi hi die den.

⁸⁶ Njühkhukechithu tsüdila nondi qole; anyithu na milikemesa pi hi meten-meshaden— hi kiqa cülo!

⁸⁷ Mathu keuna hi pathi pi zzi, isala no ajühkhukechi tsü hi n-nanchila sa nten.

⁸⁸ No ghaliki keten tsü ghena ituwi mehai tenlo, isanu hi ya n-yenthu tsü nieya thsüle kesalina.

Apvüwa yenkhukechi kenondi

⁸⁹ Njüh tsüna, O Apvüwa, anuphanla ben den; tsüna anuphan tang wi ben den.

⁹⁰ Nleben tsentsa tsüna amapi tsüdi wila ben den; no ayyi tsüpi maben wi chi, nu tsüna ben den.

⁹¹ Njühkhukechi tsü ghena pala tsüdi nansü kecu wila maben wi ben, kepaghenanye mathu tsüdila nmaghathu.

⁹² Keujüla no ayenkhukechi tsüna anonkeghe bvü nyelethu hi ketizenkesathu wi shüa kesadha.

⁹³ Hi khiela no kicükegwe kechi tsü n-ghangchila sa nben, tsüthu tsü ghena no hi ya hangya thsü.

⁹⁴ Hi nji le —hi hangsha yalo! Hi no ayenkhukechithu tsü nie le kesa ipiketsü sa.

⁹⁵ Gheshighenathu na hi pathiale hi hieben, isala hi n-yenthu tsü meshendhu ben den.

⁹⁶ Pala tsüdila masakhen ben le kesa hi chüyadha; isala no ayenkhukechithu tsüna mehai cencu.

Apvüwa Yenwa Kaghali

⁹⁷ Hi khatila n-yen tsü ghali nu! Hi ghanan thangthang la tsü meshen ben den.

⁹⁸ N-yenkhukechi tsüna matsü tsüdi wi hi ssi ben den, nu hi sapi ighinyithu miwi metsaki thsü den.

⁹⁹ Hi kesansithu tsüdi miwi hiwa meshenshi yaden, kepaghenanye hi no kicükegwe kechithu tsü meshendhu ben den.

¹⁰⁰ Hi anyi keqhaithu miwila metsaki, kepaghenanye hi n-yen khukechithu tsü nie den.

¹⁰¹ Hi nkemehai yencükithu tsüdila teshi khidha, kepaghenanye hi njüh nie mvuden.

¹⁰² Hi no kicükegwe kechithu tsü n-nanchila nsa, kepaghenanye no ketan hi kesansiwa.

¹⁰³ No kicükegwe kechithu tsüna khatila minnun nu—— anikholi miwi la minnunki!

¹⁰⁴ N-yenthu wi tsü hi kemetsa muya den, tsalina hi nkemehai yencüki tsüdi nanmeghü den.

Apvüwa yen wi Kewegü keben

¹⁰⁵ Njüh tsüna ilen ketsütson nni kecankiwa, nu ilen kewegüwa.

¹⁰⁶ Hi no kicükegwe kemeshonthu tsü nie le ijüh kedhu khishi ketheng tsü nie den.

¹⁰⁷ Ntsakhiwa, hi ketizenkesa tsüna qhethiketenle, Apvüwa; no njüh khishi ketheng tsüti, hi ya hangya thsülo.

¹⁰⁸ O Apvüwa, hi keseng kekhie ha ya cülo, nu n-yenkhukechithu tsüpi hi sansi cülo.

¹⁰⁹ Hi keshüthangla hi kahang khuchiale kesa nmessila kiden ben den; hi n-yen tsü mali nten.

¹¹⁰ Gheshighenathu na aca kesü pi hi die theng, isala hi n-yenkhukechithu tsü n-niela nsa.

¹¹¹ N-yenkhukechithu tsüna anuphanla iji; tsüthu tsüna ileben wi nonkeghewa.

¹¹² Hi keshü tsathang npi kecu chu n-yenthu tsü niele ijüh khuchidha.

Apvüwa yen wi Kemessi nkemi

¹¹³ Hi njüh meya mvutha sa ketenthu tsü nanmeghüden, isala hi n-yen tsü ghaliden.

¹¹⁴ No isheikepiwa nu hi kekhwewa; hi kaghang pi njüh khishikechi miwi chiden.

¹¹⁵ Hi wina bvülo, nthu kesamithu. Hi iNyiza na ayenkhukechithu tsü nie den.

¹¹⁶ No njüh khishi ketheng tsüti kezü pi hi cülo, isathu hi hang yaden; hi kaghang wi tsü iccükwenshü thsü nsala!

¹¹⁷ Hi ghatiyalo, isathu hi hangsha yaden, nu hi keshüthangla n-yenkhukechi wi tsü ileben chiden.

¹¹⁸ No n-yen nkeniethu tsü kesütanla yamvu nden; mathu nyu kemechu kekiden tsüna ma men nmi.

¹¹⁹ No gheshighenathu tsüpi acenya ti saden, tsalina hi no kicükegwe kechithu ghaliden.

¹²⁰ No ghena hi messiben; njühkekaghakhithu tsü ghena kemessi na hi pongyadha.

Apvüwa yen kenie

¹²¹ Mangwa na meshon nu mehai khe hi tsü kuliden; hi teshi pi ighinyithu ncüla!

¹²² No nmaghawa kiqa tenle kesa njüh khuchilo; anyi kekapvüthu ya hi npasha thsüla.

¹²³ Inyon na no wi hangshakeya kekiqawa tsü n-ghangcha ladha, khushicüle njüh khishi ketheng ghena.

¹²⁴ No ghaliki keten tsüti hi noncca tenlo, nu n-yenkhukechithu tsüpi hi sansi cülo.

¹²⁵ Hi nmaghawa le; meshenshikeya pi hi cülo, isanu hi ya no kesansi jühthu tsü chüya thsülo.

¹²⁶ Apvüwa, khili ha no kulikechi-u tsü sadha le, kepaghenanye anyithu na n-yen n-nieladha.

¹²⁷ Hi tsü suna nu suna kemehai ntsa miwi la n-yenkhukechithu tsüwa hi nen le.

¹²⁸ Tsalina hi no kicükegwethu tsüdi nie den; hi nkemehai lenthu tsüdi nanmeghü den.

Apvüwa Yen Kenie Mvu

¹²⁹ No kesansi jühthu tsüna amankesa le; hi ileben tsüdi pi tsüthu nie den.

¹³⁰ No kesansi jüh tsü khi mechan-metsa kechi wi kewegü na ghoden, nu kemetsa sengho mangla nkechüthu cüden.

¹³¹ No ayenkhukechithu tsü hi nmvu nu ipang ka ben.

¹³² No ghali ketenthu miwi kulikechi tsüti khapeghe gho hi nantizen chilo.

¹³³ No njüh khishi ketheng tsüti, hi yala nkhuli thsü lalo; nkemehai ya imiwi khangya thsü nsala.

¹³⁴ Hi pasha ketenthu wina hi hangsha cülo, isanu hi ya n-yenkhukechithu nieya thsülo.

¹³⁵ No keben tsüpi hi sawegü cülo, nu n-yenthu pi hi sansi cülo.

¹³⁶ Inyontssü na aghaku kesü ti lle dugho, kepaghenanye anyithu na n-yen n-nie mvu.

Apvüwa Yen Kemeshon

¹³⁷ No tsatanle, Apvüwa, nu n-yenthu na meshon.

¹³⁸ No ayenkhukechithu tsüna atsentsa, nu meshon cencu.

¹³⁹ Aghekepvü na imiwi anni ti mecang, kepaghenanye ighinyithu na n-yenkhukechithu tsüpi ma men nkemi sa.

¹⁴⁰ Njüh khishikechi tsüna khatila atsentsa nu! Hi khatila tsü ghali nu!

¹⁴¹ Nyu hi nchü nu n-yamvu, isala hi no kesansi jühthu tsü n-nanchila sa nten.

¹⁴² No ketsatan tsüna anuphanla ben den, nu n-yen tsüna keshüthangla atsentsa.

¹⁴³ Agükeccü nu ahathakina na hi pongyadha, isala n-yenkhukechithu na anonkeghe sengho hi cüden.

¹⁴⁴ No kicükegwethu tsüna keshüthangla meshon; meshenshikeya pi hi cülo, isathu hi hang yaden.

Khushikecü ghena Kekhie

¹⁴⁵ Hi ileben tsüdi pi no cichi; hi luneng chilo, Apvüwa, isathu hi n-yenkhukechithu tsü nie den!

¹⁴⁶ Hi no ciben; hi hangsha cülo, isathu hi n-yenthu tsü nie den.

¹⁴⁷ Aghani npi keshhugho wi hi kiqa cülo kesa no cichi; hi kaghang pi njüh khishikechi wi tsü chi.

¹⁴⁸ No kicükegwethu tsü meshendhu le kesalina, aghaja thangthang hi njenshüla khhali.

¹⁴⁹ No ghaliki ketenwa ghena ihhai kina cülo, O Apvüwa; no nanketizen pi ccüca chi, nu hi kahangli noncca cülo.

¹⁵⁰ Anyi nkemehai hi meten-mesha ketenthu na hi tetsaki gho tendha, anyi khiela n-yen nie nketenthu tsü.

¹⁵¹ Isala no ikete wi ben, Apvüwa, nu n-yenkhukechithu tsüdila anuphan ben den.

¹⁵² Hi kheni wina no kicükegwethu tsü chüya; no tsüthu yala anuphanla ben thsü.

Kekiqa Ghena kekhie

¹⁵³ Hi ketizenkesa ghangchi nu hi hangsha cülo, kepaghenanye hi n-yen tsü n-nanchila sa nden.

¹⁵⁴ Isheipiya nu hi lisha chicülo; njüh khishi ketheng tsüti hi hangsha cülo.

¹⁵⁵ Gheshighena nyi hangshaya nben, kepaghenanye mathu n-yenthu n-nie.

¹⁵⁶ Isala no nanketizen tsüna, di ntsa wale, Apvüwa; no nanketizen tsüpi ccüca chi nu hi hangshayalo!

¹⁵⁷ Hi aghinyithu nu pasha ketenthu kejonla ben, isala hi n-yen n-niela sa nten.

¹⁵⁸ Hi khathansha wi nyu matsa ketenthu tsü muya lakhe hi mathu n-ghangmvu laden, kepaghenanye mathu na n-yenkhukechithu tsü nie nten.

¹⁵⁹ Hi khatila no kicükegwethu tsü ghaliden khe ghang chilo, Apvüwa . No kaghaliwa tsüna khiela kimili nden, tsalina hi hangsha cülo!

¹⁶⁰ N-yen tonwa tsüna atsentsa, nu no ketsatan wi ajühkekaghakhithu tsüdila anuphan ben den.

Apvüwa yen wi lebenkechi

¹⁶¹ Anyi kekhang kebenthu na nkemeshon wi hi matang, isala hi n-yen tsü kinyiküden.

¹⁶² Njüh khishi kechithu tsü ghena hi khatila inonghe nu— keben kejon mukeya ghena anonghe keben ti kesa.

¹⁶³ Hi milikemesathu tsü nanmeghü nu ghangmvu nden, isala hi n-yen tsü ghali den.

¹⁶⁴ No ketsatan jühkekaghaten tsü ghena hi ghanan kesü wi tagü tughu no seng den.

¹⁶⁵ No ayenkhukechi ghali ketenthu ghena mangla kemessi nmi, ciwi mangla mathu pa pi khuli thsü meyacha.

¹⁶⁶ Hi hangsha thsüle kesalina hi no hie, Apvüwa, nu no mangwa salo khichitheng khe hi tsü saden.

¹⁶⁷ Hi no kesansi jühthu tsü nie den; hi ileben tsüdi pi tsü ghali den.

¹⁶⁸ Hi n-yenkhukechithu nu kicükegwethu tsü nie den. Hi kekuli tsüdila no mukhiben.

Kekiqa Ghena kekhie

¹⁶⁹ Hi kekiqa ghena kiqai tsü ya no cuya thsülo, Apvüwa! No khishi ketheng tsüti, meshenshikeya pi hi cülo.

¹⁷⁰ Hi kekhie kina chi, nu no khishikechi ti hi hangsha cülo!

¹⁷¹ Hi keshüthangla no seng den, kepaghenanye no n-yenthu pi hi sansi den.

¹⁷² Hi n-yen ghena akhwi saden, kepaghenanye n-yenkhukechithu na meshon.

¹⁷³ Keshüthangla hi kiqa cüle kidenben tenlo; kepaghenanye hi n-yenkhukechithu tsü nie den.

¹⁷⁴ No hangsha kecü kekiqa tsü hi khatila nmvu nu, O Apvüwa! N-yen wi tsü hi inonkeghe muya den.

¹⁷⁵ Kahang pi hi cülo, isanu hi ya no sengya thsülo; no kicükegwethu tsü ya hi kiqa kecüwa sa.

¹⁷⁶ Hi khaghaneni bhatagha kesa kesü ti deja ben; tsalina gho nu hi bhayalo, nmaghawa, kepaghenanye hi n-yenthu tsü n-nanchila nsa le.