ZAKECI 116 - Kemethajüh (N) (Re-editing) Bible (BSI)

Keshü wi hangshawa na Anyiza keseng.

¹ Hi Apvüwa ghaliden, kepaghenanye ma ihhai za; nu ma hi kekhie kina den.

² Hi ma ci kechi tsüdi wi ma hi kekhie kina cüden.

³ Keshü kemessi tsüna hi vüya; kemessi ntsa ashüjjen tsüna hi whengbhonya; kemessi nu aleben gükeccü na hi pong.

⁴ Ciwi hi Apvüwa cichi, “Hi no wi keshükene ben le, Apvüwa, hi hangsha cülo!”

⁵ Apvüwa na nantizen ntsa nu mehai; ithu Nyiza na nantizen ketenwa.

⁶ Apvüwa na kekiqa nkemithu khweden; hi kemessi wi keben wi, ma hi hangsha cü.

⁷ Nondiki benyalo, ileben; Apvüwa na ighena mehai keten ghena.

⁸ Apvüwa na keshü wina hi hangsha cü; ma inyontssü khen cü nu hi yala nyu ncha thsüla nsa.

⁹ Tsalina hi hangkeben yyi wi Apvüwa ketenpen wi tsü alentsen den.

¹⁰ “Hi pachapaghetha sadha,” hi isakhi lela, hi nondiki ben den,

¹¹ hi messi keben wi tsü hati khi, “Thola nondi ya nben le.”

¹² Ma ituwi kemehai tsüthu tsüdi ghena hi mangwa pi Apvüwa cüya mehai nu?

¹³ Hi kedsautssü khukechi sengho Apvüwa cüden, ma hi hangshakecü ghena sengle kesa.

¹⁴ Hi pi ma cüle ijühkhishi ketheng tsü pi ma nyithu tsüdi saghu keben wi tsü ma cüden.

¹⁵ Ma nyithu kesü shü kesa tsüna Apvüwa na khatila ma leben naa ben nu!

¹⁶ Hi nmaghawa le, Apvüwa; ijja ti hi no kekuli sa den. No keshü wina hi hangsha cü.

¹⁷ Hi keseng hhansha kesa khukechi pi no cüden, nu kekhie sapi no wi chiden.

^18-19 N-nyithu na saghu keben wi no kekinyijjen kemetha Jerusalem wi hi ijüh mangwa khishi theng khe tsüpi no cüden. Apvüwa senglo!