ZAKECI 115 - Kemethajüh (N) (Re-editing) Bible (BSI)

Atsentsa Nyizawa na Kesütan

¹ No ghaliki keten nu nleben tsentsa tsü ghena anyankethang tsü pi ithu nyela no ketan, nu no ketan kecü-u le, O Apvüwa .

² mangkesa na mizzatentithu na, “Nthu Nyiza na khiewa ben nu” isa ithu keü ten nu?

³ Ithu Nyiza tsüna tang wi ben le; ma mangwa kuli mvu khe tsü kuli den.

⁴ Mathu cenpvüthu tsüna rükatssü, nu suna pi kesa, tsüna anyithu kwen pi kezhü.

⁵ Tsüthu tsüna mathu pang na ben, isala ajüh khiya nten, anyon la ben, isala mu nten.

⁶ Mathu akhuna pvüden, isala zaya nten, mathu mitsan la ben, isala pala hansaya nten.

⁷ Mathu akwen ben, isala pala paya nten, accü ben, isala alentsenya nten; mathu ahhai zaya nten.

⁸ Tsüthu sa kechithu nu tsüthu nondi ketenthu tsüdila mathu na sa kechi atsikezhü tsüti sa kesawa salo.

⁹ Apvüwa nonditenlo, nthu Israel nyithu. Ma nthu kiqa nu nthu khweden.

¹⁰ Apvüwa nonditenlo, nthu Anyiza wi keqhaikedithu. Ma nthu kiqa nu nthu khweden.

¹¹ Apvüwa nonditenlo, nthu ma kinyi ketenthu tsüdi. Ma nthu kiqa nu nthu khweden.

¹² Apvüwa na ithu meshen, nu sawegü pi ithu cüden; ma Israel nyithu nu Anyiza wi keqhaikedithu tsüdi sawegü cüden.

¹³ Ma nyuwakü ketenthu tsüdi sawegü cüden, kedi sale kizza sa lela.

¹⁴ Apvüwa ya atsangathu pi no kecüwa sa— no nu nshicübvüghathu.

¹⁵ Apvüwa ya sawegü pi no kecüwa sa, atssan nu ayyi kesachiwa!

¹⁶ Atssan tsüna Apvüwa ji ketan, isala ma ayyi tsüpi anyi cüchi.

¹⁷ Keshü nyi nu keshü yyiwa wi wa ketenthu na kesütanla Apvüwa tsü sengya nten.

¹⁸ Isala ithu hang kebenthu, khili nu anuphanla nkesengcha sapi ma cüden. Apvüwa senglo!