ZAKECI 107 - Kemethajüh (N) (Re-editing) Bible (BSI)

LESÜSHEN MANGA ( Zak 107—150 ) Anyiza Kemehai Keseng

¹ “Nkesengcha sapi Apvüwa cülo, kepaghenanye ma mehai; ma kaghali tsüna anuphan ben den!”

² Apvüwa keseng wina ajüh tsüthu tsü khineng chilo, ma nthu hangshaya kesathu tsüdi. Ma nthu ghinyithu wina nthu hangsha cü,

³ nu lensie diyyiwa wina nthu ssinu gho nengdha, nishu nu nidu wina, acüla nu agha wina.

⁴ Pahan na alen nkemi yyikeshü wi tsü kugoe bvüa, nu anyunuti wi tsü ghola hangle kesa ghena mathu len mu meyala.

⁵ Mathu ghama nu dighe, nu kaghang tsüdila nmila.

⁶ Isanu mathu güccükeya wi mathu na Apvüwa cichi, nu ma mathu hathakina wi mathu hangsha cü.

⁷ Anyunuti wi hangya thsüle kesalina ma alen kemeshon wi mathu ssi.

⁸ Apvüwa na mathu ghaliki keten tsüghena mathu na ma keseng-u le, ma mathu ghena amankesathu kulikechi tsü ghena.

⁹ Ma dighe kebenthu kedighe sa cü, nu pala kemehai pi ghama kebenthu pong cü.

¹⁰ Pahan na alikedhamang nu kejang wi hang, atssüzü sa kebenthu na amigheli pvü nu agüccü,

¹¹ kepaghenanye mathu na Kekhang ntsawa Anyiza jühkhukechithu tsü matang, nu ma kicükegwe kechithu tsü meya mvula.

¹² Kekuli gükeccü wina mathu ncha la; mathu khuli nu thola mathu kiqa ncü.

¹³ Isala mathu güccükeya wi mathu Apvüwa cichi, nu ma mathu hathakina wina mathu hangsha cü.

¹⁴ Ma mathu likedhamang nu kejang wina mathu ssi shhugho, nu amigheli pi mathu bhen ketheng tsü padhipaghe pia.

¹⁵ Apvüwa na mathu ghaliki keten tsüghena mathu na ma keseng-u le, ma mathu ghena amankesathu kuli kechi tsü ghena.

¹⁶ Ma lezza pi kesa jenkathu, nu amighe kaghapengthu tsü la pashüpaghe.

¹⁷ Pahan na kejüphon, mathu kesamithu, nu nkemehai ghena ketizen saben;

¹⁸ mathu na atsse la ghangki meya la, nu shü keten ti sa.

¹⁹ Isanu mathu güccükeya wi mathu Apvüwa cichi, nu ma mathu hathakina wi mathu hangsha cü.

²⁰ Ma ma jühkhukechi pi mathu sapi mehai cü, nu ashüjjen wina mathu hangsha cü.

²¹ Apvüwa na mathu ghaliki keten tsü ghena mathu na ma keseng-u le, ma mathu ghena amankesathu kuli kechithu tsü ghena.

²² Mathu na ahhanshathu pi ma keseng-u, nu anonkeghe khwithu sapi ma kulikechithu tsü khipi nyu kekiza-u le.

²³ Pahan na ahunjjen wina atssükedone miwi wa, atssükedonethu wi pi mathu pang wi kechi ghena kuli.

²⁴ Apvüwa na mangwa kuliya mehai khe mathu na tsü muya, atssükedone wi ma kekuli amankesathu tsü.

²⁵ Ma ma jüh khuchi nu ameghü kekhang na sho ghola atssükullu pakethu chi.

²⁶ Ahunjjenthu tsü pieki pi ameghü wi chi, nu pila ma kedhu wi du thsü. Kemessi hati kesa wi anyithu na mathu kempvüza nmila;

²⁷ mathu na adina pvü ketenthu ti accümeshü nu acükha khalukhalu— mathu sapichü tsüdila ma men nmila.

²⁸ Isanu mathu gükeccü wi mathu na Apvüwa cichi, nu ma mathu hathakina wi mathu hangsha cü.

²⁹ Ma caghamo nkemehai tsü khasha, nu atssükulluthu tsüna ceen ben wa.

³⁰ Ceen sa kesa tsü ghena mathu anonghe, nu ma mathu hangsha senghola mathu na wa mvu keben ahunthu kenganpen wi tsü chicü.

³¹ Apvüwa na mathu ghaliki keten tsü ghena mathu na ma keseng-u le, ma mathu ghena amankesathu kuli kechithu tsü ghena.

³² Anyithu na saghu keben wi tsü ma kedi pi thang kechi-u, nu alikesathu na saghu keben wi tsü ma keseng-u le.

³³ Apvüwa na aghakuthu sapi kiqha thsüa, nu atssü yala nbvüshi thsüla.

³⁴ Ayyi ciwi kahangthu gheshighena ghena ma ayyi kemehai tsüpi kekishen ghansha kesü sa thsüa.

³⁵ Ma ayyikeshü tsü sapila atssü kencen pen sa thsüa nu ayyi kekiqha pi atssü kebvüshi penthu sa thsüa.

³⁶ Ma anyi ghama kebenthu yala ciwi hang thsü, nu mathu anyunuti sa nu hang.

³⁷ Mathu na alli witsü amacü pi vvü, nu kemeshentsse ton pi shengchi, nu pvüya ntsa saya.

³⁸ Ma ma nyithu sawegü cü, nu mathu atsanga kejon benya; ma mathu mesüsithu ya nzeng neng thsü.

³⁹ Khathansha wi aghi nkemehai kepasha, nu ketizenkesa pila Anyiza nyithu kimenni nu kihhesha khe,

⁴⁰ ma mathu pasha ketenthu meshensa kesa pi ccüca chi, nu mathu yala alen nkemi yyikeshü wi kugoe thsüa.

⁴¹ Isala ma mangla nkemithu tsü mathu gükeccü wina hangsha cü, nu mathu theghithu sapila anenithu ti ji kayi yathsü.

⁴² Ketsatanthu na ha mu nu anongheya, isala anyi gheshighenathu tsüdila ceen benwa thsüa.

⁴³ Anyi kemetsathu yala hathu ha meshen ketenwa sa; mathu na Apvüwa ghaliki keten tsü meshen ketenwa sa.