ZAKECI 106 - Kemethajüh (N) (Re-editing) Bible (BSI)

Apvüwa na Ma Nyithu tuwi Kemehai

¹ Apvüwa senglo! Nkesengcha sapi Apvüwa cülo, kepaghenanye ma mehai; ma kaghali tsüna anuphan.

² Thowa na ma amankesa kulikechi tsüdi khiya mehai nu? Thowa na ma seng ntsa saya mehai nu?

³ Ma jühkhukechi kina ketenthu, nu keshüthangla kemeshonwa sa ketenthu na kemihhi ntsa.

⁴ Hi meshen chilo, Apvüwa, no n-nyithu kiqa kecü wi tsü; no mathu hangsha kecü wi tsü hi la pi saghu cülo.

⁵ Hi ya n-nyithu mehai kayi kesa tsü mu yathsü, nu n-mizzatentithu anonkeghe wi tsü ishei la benya thsülo, nji sa keyathu kenong kekapvü wi tsü.

⁶ Ithu la ithu bamyithu ti samidha; ithu na gheshighena nu nmehai la ghodha.

⁷ Ithu bamyithu na Anyiza na Ejipt wi amankesa kulikechithu tsü nchüla; matsü kejon wi ma kaghali pi mathu ccüca kechi tsü malia, nu Kenmie Tssükedone wi tsü mathu na Kekhang ntsawa tsü ssikaghashen.

⁸ Isala ma jühkhishi ketheng ti ma mathu hangsha cü, ma kekhang pi ccüca chile kesalina.

⁹ Ma ahza pi Kenmie Tssükedone cüchi, nu tsüna kiqha; ma ayyi keqen wi ma nyithu ssinu shhu.

¹⁰ Ma mathu n-ghangmvu ketenthu wina mathu hangshaya; mathu ghinyi wina ma mathu hangsha cü.

¹¹ Isala atssü na mathu ghinyithu meyanthia; kesütanla hang meyala.

¹² Tsasengwi ma nyithu na ma jühkhukechithu tsü nondiya, nu kesengkhwi sapi ma wi chi.

¹³ Isala mathu na wan nu ma kulikechi tsü mali nu ma kesansi tsü n-niela kulia.

¹⁴ Ayyikeshü wi tsü mathu kenmvu pi mathu pong pvüya, nu Anyiza pi ghankenan wi chi;

¹⁵ tsalina mathu na mangwa khie khe ma pi mathu cü, isala adhagha nkemehai la kesun pi mathu jawi chi.

¹⁶ Ciwi ayyikeshü wi mathu na Mosa nu Aaron, Apvüwa kemetha maghathu ghang pi anyonsa.

¹⁷ Tsasengwi ayyi na qankhhi nu Dathan meji, nu Abiram nu ma theghithu mejubhon;

¹⁸ anni na mathu senkeniethu miwi dugho, nu anyi gheshighenathu tsü mecang.

¹⁹ Mathu na Sinai wi suna pi amesü zza süpon kesü cüya, nu atsikezhü tsü kinyi;

²⁰ mathu na Anyiza nyankethangwa tsü pi aghangwa dsaketen aghangsa tsikezhü tsü ketonlia.

²¹ Mathu na Anyiza ma kekhang wina Ejipt wi mathu hangsha kecüwa tsü malia.

²² Ma ciwi amankesa khatila kuli chi nu! Kenmie Tssükedone wi tsü khatila amansa nu!

²³ Anyiza na ma nyithu yasa cüle khi kechi wi, ma amagha kessikeyawa Mosa na shagha Anyiza matang, nu ma ghekepvü wina mathu yasa le keben tsü khen.

²⁴ Isanu mathu na ayyi kemehaiwa tsü meya mvula, kepaghenanye mathu Anyiza jühkhukechiwa tsü n-nondila.

²⁵ Mathu na mathu nitsüjjen non wi ben, nu nbvümugho nu Apvüwa jüh nkina.

²⁶ Tsalina ma mathu yala ayyikeshü wi tsü shü thsüa ten le kesa kishen,

²⁷ nu mathu shicübvüghathu yala Anyiza nkechüthu yyi wi bvüzighe thsüa, nu mathu ya lensie diyyiwa wi shü thsüa.

²⁸ Isanu Peor wi Anyiza nyithu na saghu nu Baal kinyi, nu ahhansha sapi kahangli nkemi cenpvüthu kecü tsü dsa.

²⁹ Mathu kekulithu tsü ghena Apvüwa lebenketsu kethouchi, nu adhagha nkemehai ntsa mathu jawi shhughoa.

³⁰ Isala Fineha na shagha nu kulizzi ketenthu tsü meten-mesha, nu adhagha tsü khen.

³¹ Ma nyan kemehaiwa tsüna tsü nten na meshen gho, nu ghaketen matsü tsüdi wila.

³² Meriba Tssükebvüpen wi anyithu na Apvüwa sapi ma lebentsu thsüa, nu Mosa na mathu ghena agükeccü wi ben.

³³ Mathu na ma sapi aghepvü ntsa sa thsü kesalina ma meshen n-nanla khia.

³⁴ Apvüwa na mathu wi ajühkhukechi tsüti kuli kesawa nyela, mathu na Anyiza nkechüthu tsü npathila.

³⁵ Isala mathu na tsüthu ssinu keyali, nu mathu cenpvü nkechü yenthu sen wa.

³⁶ Anyiza nyithu na atsikezhü kinyi wa, nu ha ghena mathu kededi sachia.

³⁷ Mathu na mathu tsangathu pi ahhansha sapi Kanaan wi atsikezhüthu cü.

³⁸ Mathu na kesazzi chü nketen ghanyithu pathi, nu tsüthu kepathi ghena ayyiwa tsü nakhia.

³⁹ Mathu kekuli ghena mathu ketanla mathu sapi nmetha thsüla, nu Anyiza wi leben tsentsa nsenla.

⁴⁰ Tsalina Apvüwa na ma nyithu miwi lebentsu; Ma mathu nan-nonhi.

⁴¹ Ma mathu teshi pi Anyiza nkechüthu kekhang wi chia, nu mathu ghinyithu na mathu miwi kekhang senya.

⁴² Mathu ghinyithu na mathu pasha, nu mathu na nyu cakhu wi hangtha wa.

⁴³ Matsü kejon wi Apvüwa na ma nyithu hangsha cü, isala mathu na ma matang le kesa kessiya, nu kesami wi dhu kayi dua.

⁴⁴ Isala mathu na qai kechi wi Apvüwa na mathu hhai kina cü, nu ma mathu hathakina tsü ghangchi.

⁴⁵ Mathu ghena ma cenkethenjüh tsü meshen chi, nu ma ma kaghali kedi tsü ghena ma leben zan nengya.

⁴⁶ Ma mathu pasha ketenthu tsüdi sapi mathu ghena leben-naa thsüa.

⁴⁷ Ithu hangsha cülo, O Apvüwa ithu Nyiza, nu mizzatentithu jawi na ithu ssinu kheneng gholo, isalethu ithu na no nkesengcha sa, nu n-nyan kemethawa tsü seng den.

⁴⁸ Apvüwa senglo, Israel Nyizawa; khili nu anuphan ma senglo! Anyi tsüdila ya “Amen!” khi thsü. Apvüwa senglo!