ZAKECI 104 - Kemethajüh (N) (Re-editing) Bible (BSI)

¹ O Apvüwa, iNyiza, no khatila di nu! No ajenkeben nu anyankethang pi nthsümeni sa pvüden;

² no ketanla kewegü pi no mejuya. No atssanthu pi anithsü ti shighe chi,

³ nu tang atssü miwi njjen saya. No akuluthu pi no gorugari saya, nu ameghü kesho miwi ben nu wa.

⁴ No ameghü tsüpi njüh kepvüwa sa thsü, nu atsancwe tsüpi nmaghathu sa thsü.

⁵ No ayyi ya zükeqhe ma kekidegüpen wi ben thsü, nu tsüna khiela papheghe meyacha.

⁶ No atssükedone pi tsü miwi athsü ti shichi, nu atssü na ayikhathu danbhon ya.

⁷ No atssü kha kechi wi mathu na lle bvüa; njüh khukechi kemagha tsü zakeya wi mathu kaghaji nu lle bvüa.

⁸ Mathu ayikhathu wina lle sen nu yyiketijü wi, nu mathu ghena apen sapi ketheng wi tsü du.

⁹ No mathu ya ayyi nwhengbhon thsüle kesalina, pvüdhi nkeyacha ggü kesü sachi.

¹⁰ No yyiketijü wi atssü sapi bvü shhugho thsü, nu aghakuthu na yyishiphon thu jü wi wa.

¹¹ Tsüthu tsüna atssü pi aghangsathu cü; ciwi agheja wi gadathu na mathu kedighe saya.

¹² Tsü kete achantonthu wi awathu na mathu ghacen ghü nu khou.

¹³ Atssan wina no atsankegho kesun pi yyishiphon wi chi, nu no kesawegü pi ayyi pong cü.

¹⁴ Amesüsithu ghena no aghangthu ya shigü thsü, nu anyi ya achanton sen yathsü, isanu ma ya yangdsaketenthu shigü yathsü,

¹⁵ nu ma sapi ma nonghe yathsü le kesalina kedsautssü sa shichi, oliv dile ya ma sapi ma mmi meza yathsü, nu amesa pi ma satezü yathsü.

¹⁶ Lebanon wi Sedar chanthu na atsankegho kejon pvü yaden— Apvüwa chantonthu tsüna ma pi keyangchi.

¹⁷ Ciwi awathu na mathu ghacen ghü; atssüwa ccükesiewa na asahong ton wi mathu ghacen ghü.

¹⁸ Amejüthu na ayikha kemisi wi hang, nu amekhiethu na alonshipvü witsü kuthi.

¹⁹ No asha sapila tsathang siya thsü; aghani na ma kedu tsü tsü chü.

²⁰ No aghaja sachi, nu kejang wi tsü aghangsathu tsüdila shhugho.

²¹ Ssensitemithu na ghamo, nu Anyiza na mathu tsse pi mathu kecü tsü bha.

²² Khathansha wi aghani na shhugho lakhe, mathu kheneng wa mathu ku wi jen waden.

²³ Isalethu anyithu na mathu kekuli sale shhu, nu npi keminu chu kekuli sa ben den.

²⁴ Apvüwa, no pala kejon sa chidha! No khatila metsa nu tsüthu tsü sachi nu! No sakechi kahanglithu na ayyi pong ben.

²⁵ Ciwi atssükedone na di nu meza ben, si nkeyakhi kahangli, kedi nu kizza tsüdila ciwi ben.

²⁶ Ahunjjenthu na tsü miwi wa, nu ciwi Leviathan ghassübvü no sa kechi.

²⁷ Mathu tsüdila nsenthu yishü keben wi no atsse pi mathu kecü tsü maghaki nu hang den.

²⁸ No tsüthu pi mathu cü, nu mathu na tsü dsaya; no atsse pi mathu cü, nu mathu anonkwen yaden.

²⁹ Khathansha wi no khapeghe bvü lakhe, mathu na messi waden; khathansha wi no ahathakekissa tsü khuya khe mathu na shüden, nu ayyi pi mathu saketheng wi tsü wa neng thsüden.

³⁰ Isala no khathansha wi ahathakekissa pi mathu cü khe mathu hang yaden; no kahang ketheü pi ayyi wi chi.

³¹ Apvüwa nyankethang ya anuphanla ben keyawa sa! Ma sa kechithu miwi tsü Apvüwa ya ma nonghe ketenwa sa!

³² Ma ayyi wi ghangchi nu tsüna kedheggü; ma ayikhathu kidhen chi nu tsüthu na ma nikhu shhugho.

³³ Hi kahang mabenla akhwi sapi Apvüwa cüden; hi hangkeben chu hi kesengkhwi sapi Anyiza cüden.

³⁴ Ikhwi yala ma kenen sa keyawa sa, kepaghenanye inonkeghe tsüna ma wina gho.

³⁵ Ayyi wina kesamithu tsü yasa kesawa sa; anyi gheshighenathu yala nmi thsüla kesawa sa. Apvüwa senglo, ighamu! Apvüwa senglo!