TITA 2 - Kemethajüh (N) (Re-editing) Bible (BSI)

Sansimeshon

¹ Isala no tsü kesansijüh kemehaiwa tsü nie nu pi nyu nsansithu yishü.

² Keshenpfü keqhaithu ya meghe-metsa, kemeshen kiyan, kekhenengya, kenondi wi mehai, nyu tizen, nu kethan-kehi yalo kiza.

³ Tsü makesü kinyibvü keqhaithu wi ayencüki kemehai kahang kemetha wi hanglo kiza. Mathu na nyu ghükesa nyi nyelela kisengtssü tssüzü kesathu sa yishü. Mathu kemehaiwa pi nyu nsansithu yishü,

⁴ nu kinyibvü ccülithu sansi pi mathu wubathu nu mathu tsangathu tizenghaliya,

⁵ kekheneng nu methaya, ajjenku wi zanki-zanlaya, ccatssüya, nu mathu wubathu jühya thsüle kesalina; isathu thola Anyiza wina kegho ketsijühwa tsü khimeshü meyacha.

⁶ Tsüti anyi kepvünyithu la mathu kekheneng yalo kiza ntsa chilo.

⁷ No pala tsüdi wi n-yencüki kemehai tsütsonca nsathu yishü. No nyu kesansi wi lebenchi nu meshen pi kiyan benlo.

⁸ Nghinyithu yala ithu miwi nkemehai mangla nkhi thsüla kejügheya thsüale kesalina nyu then nkeyacha jüh kemehai khilo.

⁹ Nssümaghathu ya pala tsüdi wi la mathu pvüthu jühkina nu mathu kenen salo. Mathu na mathu jüh nlunengla,

¹⁰ nyelela mathu wi pala n-ghanfüla. Isala mathu na keshüthangla kemehai nu ajühtsentsa kesa pi nyu nccücathu yishü, isanu mathu kekuli tsüdi wi ithu Hangshawa Anyiza cüki pi kesansi wi kemehai cüki khiya thsüle kesalina.

¹¹ Kepaghenanye Anyiza na ma nanketizen wi anyi tsüdi ghena hangshakeya tsü pi ccüca chidha.

¹² Nanketizen tsüna ithu sansi pi ayyi ha wi kahang nkemehai nu ayyi kenenwa tsü teshi thsü, nu kekheneng keya, ketsatan, nu kahang kemehai wi hangya thsü,

¹³ isanu ithu na atsathang kemehaiwa, ithu Nyiza kedi nu Hangshawa Jisu Khrista nyankethang sa gho keten tsü hie nu ghangben thsüben.

¹⁴ Ma ithu ghena ma gwo khuchi, gheshighena tsüdi wina ithu khushiya nu ithu pi ma nyi kemetha saya nu kemehai kesa mvu nyi sa thsüle kesalina.

¹⁵ Hathu ha pi sansi nu no saya kemehai tsüdi sen nu njüh kizathu kechü-kenong nu kha chilo. Anyi thola ya no nkhichi nsa thsüla.