SHICÜSI 8 - Kemethajüh (N) (Re-editing) Bible (BSI)

Ahulathu pi Kechi

¹ Apvüwa na Mosa kiza,

² “Aaron wi ma khathansha ahula tagü tsüpi ma kedonpen wi chi khe ma tsüthu pi chi nu kewegü ya atu wiwa wegüya thsülo kizalo.”

³ Aaron na tsü kinaya nu ahulathu pi ma kedonpen tuwa wi peghela chia.

⁴ Apvüwa na pi Mosa keccüca tsü kenie wina ahula kedonpen tsüna ma li na cü ma ccü kecu suna cü pi sa theng.

Levi Nyithu Satekemetha

⁵ Apvüwa na Mosa kiza,

⁶ “Israel nyithu ja wi Levi nyithu tsü khuthi pi makepa sa nu mathu satemetha chi,

⁷ hati salo: satekemetha tssü pi mathu keghü nu mathu gwo maben wi assen whi thsülo, nu mathu thsümeni ghasü thsülo. Isalethu mathu na keccüna wi metha shaben.

⁸ Tsaseng wi mathu na amesü zza asüpon kesü khuya, nu awheng nu adeli saghu pi asu pi kekinyi saben; nu no kesami ghena kekinyi amesü süpon kepa la khuya.

⁹ Tsaseng wi Israel nyi tenti maben cighu chi nu Levi nyithu pi hi ketenpen Nithsüjjen tuwi ngan thsülo.

¹⁰ Israel nyithu na mathu kwen chang pi Levi nyithu miwi chi,

¹¹ nu Aaron na Israel nyithu ja wi Levi nyithu tsü satemetha pi aju kemehai sapi hi cü, isanu mathu ya hi kekuli sa thsüben.

¹² Levi nyithu na mathu kwen chang pi amesü süpon keni li miwi chiben; keccüna wi Levi nyithu satemetha le kesalina tsü kesü pi kesami ghena kekinyi nu kepawa pi mecang pi kekinyi saben.

¹³ “Levi nyithu satemetha pi aju kemehai sapi hi cü, nu Aaron nu ma tsathu pi mathu ccüli sa thsülo.

¹⁴ Israel nyithu ja wi hatinu Levi nyithu khuthi pi makepa sa, isanu mathu na iji saben.”

¹⁵ No Levi nyithu sametha nu satemetha pi ccüla mathu na Nithsüjjen wi kekuli kesa qo nyi saben.

¹⁶ Hi Israel nyi tsa tssütsethu tsüdi mithon wi mathu pi ijile nkayadha, nu mathu na iji sadha.

¹⁷ Khathansha hi Ejipt wi tsa tssütsethu tsüdi pathi khe hi Israel nyi tsa tssütsethu nu asahang zza tssütsethu tsüdi satemetha pi iji sadha.

¹⁸ Hi khili Israel nyi tsa tssütsethu tsüdi mithon wi Levi nyithu khuyadha,

¹⁹ nu hi Israel nyithu ja wi Levi nyithu pi aju ti sala pi Aaron nu ma tsathu cü, Israel nyithu ghena Nithsüjjen wi kekuli sa nu mathu na Kemetha Pen kete wi gho lethu agükeccü na mathu miwi kegho wi Israel nyithu khweya thsüle kesalina.

²⁰ Tsalina Apvüwa na Mosa kekiza ti Mosa, Aaron, nu Israel nyithu na Levi nyithu satemetha chia.

²¹ Levi nyithu na mathu ketanla mathu sametha nu mathu thsümeni ghasü, nu Aaron na mathu satemetha pi aju kemehai sapi Apvüwa cüa. Ma mathu ghena la sakemetha keccüna sachi.

²² Apvüwa na Levi nyithu ghena Mosa kekiza tsü anyithu na tsüdila sa. Tsalina Levi nyithu na Aaron nu ma tsathu kekhu wi Nithsüjjen wi kekuli kesa qo nyi saya.

²³ Apvüwa na Mosa kiza,

²⁴ “Levi nyi kesüsü kahang mapi nkwe nu manga sacüla hi ketenpen Nithsüjjen wi ma kekulithu sa waben,

²⁵ nu kahang mapi deni wi ma nganwa shaben.

²⁶ Tsaseng wi ma ma Levi nyi na Nithsüjjen wi mathu kekuli kesa wi kiqaya mehai, isala ma ketanla kekuli mangla sa nben. No hatinu Levi nyithu kekuli yen sapi cüben.”