SHICÜSI 5 - Kemethajüh (N) (Re-editing) Bible (BSI)

Anyi Nkemetha

¹ Apvüwa na Mosa kiza,

² “Ahza pi Israel nyithu cü nu kemnanpen wina anyi agükedsakenaa pvü ketenwa, nyelela agwotssü keji kebenwa nu keshü kamang kekidhen ghena nmethala keben tsüdila jügüshilo.

³ Keccüna wi nkemetha nyi hathu tsüdi jügüshilo, isanu mathu na hi inyithu ja wi hangketen kemnanpenwa tsü n-nakhi thsü lalo.

⁴ Israel nyithu na tsü kinaya nu kemnanpen wina mathu tsüdi jügüshi shan.”

Kesazzi Ghena Kedhineng

⁵ Apvüwa na pi Mosa kecü,

⁶ Kecükegwe hathu ha Israel nyithu ghena. Anyi kesü na Apvüwa wi jühtsentsa nsala nu anyi pahan tuwi sami lethu,

⁷ ma kesami khishi nu maben dhineng, tsümiwi meza wi gishü nkwe pi wwapi ma anyi tsü tuwi sazzi kesawa cüaben.

⁸ Isala anyi tsüwa na shü nu ma shili ghatsanwa na kedhi tsü keya nyi nmi lethu, tsüpi keqhaikediwa ghena Apvüwa cüaben. Anyi kesazziwa ghena satekemetha keccüna wi kesen aneni süpon tsümiwi kedhi hawa ha saben.

⁹ Israel nyithu na aju kemehai ntsa sapi Apvüwa kecü tsü la keqhaikediwa ji.

¹⁰ Keqhaikedi kesüsü nyu aju sapi ma kecü tsüpi theng yaben.

Awuba Na Awubvü Meshensakesa

¹¹ Apvüwa na Mosa kiza

^12-14 nu kecükegwe hathu pi Israel nyithu cü thsü. Npvüza kesü ma wubvü na ma wi jühtsentsa nsala nyu kepa wi ssijen nu ma ketanla ma yasa dhale meshensaya mehai. Isala awubawa na tsu chütha meya, kepaghenanye ma wubvü na kuthi benlaben — ciwi chüza nmi, nu nzawa na tsüti kulikeben ghan meya. Nyelela nzawa na jühtsentsa saben lela awubawa na ma wubvü meshensa ya mehai.

¹⁵ Ajjügi ha keni wi npvüzawa na ma wubvü ssinu keqhaikediwa wi waben. Ma kekinyi ghena la achentha wheng kilogram kesü khuyaben, isala ma oliv deli nyelela hankedemvu pi tsü wi chi nben, kepaghenanye tsüna awubawa na atsentsawa chüyale kesa ghena kekinyi kesü.

¹⁶ Keqhaikediwa na nzawa ssigho kekinyipen tuwi ngan thsüben.

¹⁷ Ma kemetha tssü pi ayyikhu kesü wi keshu chi nu Apvüwa ketenpen Nithsüjjen wi ayyi pahan khuya nu pi atssü wi chiben.

¹⁸ Tsaseng wi ma nzawa lissen tsü lisha nu kekinyi kesa wheng tsüpi ma kwen wi chiben. Keqhaikediwa na ayyikhu wi kishen-keshi sen kegho kekha tssü kebenwa tsü ma kwen wi khusenya.

¹⁹ Tsaseng wi keqhaikediwa na hati khi nu nzawa ya kishen thsüben: “Keujüla no nyu ssinu keqheza nsalethu, kishen-keshi sen keghowa tssü ha no yasa nben.

²⁰ Isala no nyu ssinu keqheza sadha lethu,

²¹ Apvüwa ya n-nyithu ja wi n-nyan kishen kecüwa sa. Ma ntsigwo sapi cügho thsü nu npvü ya pvü shhugho thsü kesawa salo.

²² Atssü ha npvü wi du nu sapi pvü thsü nu ntsigwo sapi cügho thsü kesawa salo.” Nzawa na tsü luneng ben, “Tsüna ntsakhiwa, Apvüwa na imiwi tsüti kesawa salo.”

²³ Isanu keqhaikediwa na kishen-keshi ha zhüya nu tsü bhusha pi kekha khu wi chiaben.

²⁴ Ma naa ntsa saya kemehai tssü pi nzawa npi kejjü thsü wi

²⁵ keqhaikediwa na nzawa kwen wi kekinyi kesa wheng tsü khuya nu tsü zanki nu satekemetha pi Apvüwa cü nu pi kekinyipen miwi chiaben.

²⁶ Ma tsü awha kesü khuya nu pi kekinyi zensu sa kekinyipen miwi mecang ben. Asakhen wi ma atssü tsüpi nzawa jjü thsüben.

²⁷ Keujüla nzawa na nyu ssinu qhezadha lethu atssü tsüna ma sapi naa ntsa sa thsü, ma pvü na pvü shhugho nu ma tsigwo na cügho shaben. Ma nyan na ma nyithu ja wi kishen-keshi kesü saben.

²⁸ Isala ma nsazzi lethu mangla sa nben, nu atsanga pvüghaya mehai.

^29-30 Ayen hawa ha npvüza kesü na anonmeyen nu ma wubvü na nyu ssinu qhezadhale kemeshensa ghena. Nzawa tsüpi kekinyipen tuwi ngan thsü nu keqhaikediwa na keccüna ha saben.

³¹ Awubawa na kesazzi sa nben, isala nzawa na sazzi theng lethu ma tsü ghena ketizen saben.